Ram pumah vawk a pûl ta Sorkarin a ṭanpui dawn em?

African Swine Fever (ASF) chu Mizorama district zawng zawngah a leng tih finfiah a ni tawh a, he vawk pûl hri avang hian vawk 9,859 an thi tawh.

Khawvel pumin mihring thihpui theih hripui hlauhawm tak Covid-19 avanga harsatna nasa tak a tawh meklaia vawk pûl hri leng hian chhungkaw tam tak harsatna leh retheihna a belh­chhah a, tunah Mizo­ram pumah ASF a leng tihfinfiah a nih hnuah phei hi chuan a manganthlak takzet a ni. He hri leng hi Mizoram pawn aṭanga dan loa vawk lakluh aṭanga lo lut anga sawi a ni a, sorkar lam pawhin a chhui chiang dawn a; chhungkaw tam tak rûmna thlentu a nih avang hian dan bawhchhiaa vawk lalut an awm a nih chuan chak taka chhui chhuah ngei chi a ni.

ASF hian chhungkaw tam tak eizawnna a tibuai a, thingtlang mirethei zawk vawk vulha innghatte an lainatawm rualin vawk farm lian tak siama a hlawma vawk chânte pawh an khawngaihthlak a ni. AH&Vety department lam pawhin an phak tawkah theihtawp chhuah ve bawk mah se hri laka invenna an nei bik lo a, vawk thi sawngbawlna ngaihtuah ringawt pawh hi hna hautak a tling a ni.

Hetih hunah hian sorkar hi sorkar a nih a ngai a, mipuite tana inzuar ṭhinte bawk kha an nih avangin mipuiin an mangan huna an koh phaka an awm a ngai a ni. Tuna sorkarna vawn fung chelhtu MNF hian inthlan dawnah SEDP kal tlanga sum sem an tum thu an tlangaupui a, cheng nuai thum an sem tur thute pawh a video thlengin hmuh tur a la awm vek avangin vawk vulhtute tan tal hian an pek chhuah hma­sak a ṭha hle ang.

Chhun tin hnena cheng nuai thum sem an tum kha an la sem thei rih lo a nih pawhin ASF avanga vawk chânte tal hian zangnadawmna pawisa hi kan state sorkar hian pe chhuak thei se, ASF len hma pawha mipuiin an dil hauh hmaa cheng nuai thum pek tiamtu an nih angin vawh vulh avanga lungngaia rûm mekte chhawmdawlna hi sorkar hian ngaihtuah rang se a ṭha ang. Inthlan dawna kan vote an duh avanga pawisa pek min tiamtute hian an mipui ṭapa indawm kun ngawih ngawihte hi an amamwh hunah ṭanpuina sem ve se, Mizorama vawk vulhtute hian ṭanpuitu sorkar an mamawh ta takzet a ni.