Sorkar ruahmanna fakawm

Mizoram State Disaster Management Authority hnuaia State Executive Committee (SEC) ruahman angin Covid-19 dotute hman tur Personal Protective Equipment (PPE) ṭhahnem tak chu hri leng avanga thawh tur nei lo puanṭhui thiam mi 300 rualin an ṭhui mek a; he mi atan hian State Disaster Response Fund-a cheng nuai 233.98 hman niin a ṭhuitu turte hi Commerce & Industries depart­ment-in AMC huam chhunga Local Level Task Force kal tlangin an thlang a, Aizawla Veng 84 tuam chhuah tura ruahman niin veng 42-ah an ṭhui ṭan mek a ni.

PPE a ni emaw, face mask ṭhui a ni emaw, hri dona thilah kher lo pawh mahni state chhung duhsakna chang hriat leh state chhunga mite tana remchang siam thiam hi a pawimawh a, kan tih ve theih reng hi tlema a tlawm deuh avanga state pawn aṭanga chah luh zel hian tualchhunga hnathawktute thawh tur a bo zel tih hriat a ṭha a; chutih rualin tualchhunga thawktute pawhin duhsak tlak leh sorkar tan pawha zawngchhang tlaka an thawh a ṭul thung ang.

Covid-19 hripui leng tuar na ber hi sawi chian fak theih ni lo mah se khawpuia miretheite (urban poor) hi an ni maithei a, hun rei tak chhung an eizawnna an chhunzawm theih loh avangin chhungkaw tam tak chu an mangang tawh hle a ni. Hetiang huna puanṭhui thiamte tana remchanna siamsak hi a finthlak a, an kuthnu hi a him lo a nih loh chuan sorkar tan pawh state pawn lam dawr buai kher loa kalpui zel a ṭhat hmel.

Heng PPE an ṭhuite hi hri dona kawnga thawktute mamawh phuhrukna a nih piah lamah khawpuia mi harsate chhawmdawlna remchang ṭha tak a ni tel. Hei mai hi ni loin state pawn aṭanga PPE ṭhui chah luhnaa sum kal ral tur chu Mizoramah a mamawhtute kutah a lut dawn tihna a ni a, ruahmanna fing tak niin kalpui chhunzawm zel a ṭha ang.