Ramria MZP duh dan leh a tak ram

MZP General Headquarters chuan tun hnai khan chief minister Zoramthanga hnenah ramri humhalh tura Mizoram sorkar hmalakna chak tâwk lo an tih thu thlenin, Council of Minister-in July 8, 2019 khan Bengal Eastern Frontier Regulation (BEFR), 1875 chu Mizoram ramri atan an pawm chu a taka bawhzui turin an ngen a; tun hnaia Assam sorkarin hma thar a lakna leh an inkulhna hmun chu BEFR 1875 ramri chhung a nih thu tarlangin MZP chuan, "Kan ram chhunga rawn inkulh Assam police-te hi a rang thei ang bera Mizoram aṭanga ûm chhuak turin Mizoram sorkar kan ngen a ni," tiin Assam police-te an inhnuhdawh hma chuan Assam sorkar chu eng level-ah pawh biak loh ni se an duh thu an tarlang.

Zirlai pawl lam hian kan sorkar hruaitute thurel anga kan ramri hi kan ramri atana an duh thu Chief Minister hi an hrilh nawn a ni ber a; nimahsela tuna Assam lamin min nawr tawmna chin hi chu kan ramria kan pawm ni loin Assam-in an ramri chin nia an ngaihah a ni ta deuh ber a, hei hi a zia lo hle a ni. Assam-in ramria an kawh chin hi kan pawmpui leh pawmpui loh chu thuhran ni se, tuna kan police-te inkulhna leh Assam lam police-te inkulhna chin hi chu 1875 ramri nen chuan a inang lo hle a, kan sorkar hian ramria a pawm chin hi a humhalh lem lo ti ila a sual lo ang.

Ramri buaina chinfel hi thil awlai a ni lo a, state hrang hrang hian ramri buaina hi an nei neuh neuh a, Assam ngei pawh hian hmun dangah pawh ramri buai hi an nei. Heng ramri buainate chingfel tur hian sorkar thuneitu lu an indawr a nih loh chuan a fel hleithei lo a, chumi tura kan hotute an feh chhuak a nih loh chuan rûn dalah, 'Council of Minister-in BERF 1875 ramri kha kan pawm,' an ti ringawt ang a, a taka bawhzui a awm si lo.

MZP lamin kan sorkar ramri pawm chin humhalh an duh hi Mizo mipuite duh dan pawh a ni a; nimahsela he ramri humhalh ngam tur leh humhalh thei tur hian kan sorkar hi a chak tawk lo a, a huaisen tawk lo a ni thei a, chumi piah lamah an nek tur Assam hi BJP sorkarna a nih avangin NEDA hnuaia thawkho an nih si avangin ramri chungchanga nêk ngam tur hian kan sorkar dinhmun hi a remchang lo pawh a ni thei. Tun thleng hi chuan sorkar hruaitute'n a thuphunga ṭhukhawma an pawm tawh hi kan ram chhunga rin lut turin Assam sorkar hruaitute an la dawr chhin lo a, sorkar laipuiah pawh an la thlen lo a, court-ah pawh an la kal lo a ang a, MZP-in ramria an duh leh a tak ram hi chu a kar a inhlat hle a ni.