Thingtlangah sikul a hawn ṭan theih em?

School Education depart­ment chuan hripui vei awm lohna khuaahte sikul kal phalsak tawh tura ngenna tun hnai khan State Executive Committee (SEC) hnenah an thlen a; hetihlai hian ṭha zawk leh mumal zawka online/offline hmanga zirna kalpui a nih theih nan Mizoram sorkar chuan July 12, 2021 aṭangin sikul a hawng dawn a, zirtirtute chauh sikulah an kal rih ang.

Hripuiin kum khat chuang min chenchilh ta a, Mizoramah ngei pawh mi 100 chuangin nunna an chan phah tawh a, he hri lakah hian kan fimkhur a la ngai reng. Inkhuahkhirhna leh inkaihhruaina pawh khauh taka kalpui reng a la ṭul. Hetihlai hian tun thlenga hripuiin a la tihbuai ve loh khaw ṭhahnem tak an awm ve bawk a, heng khuaahte hian zirna sikul hawn a hun tawh lo maw?

Thingtlang khaw tam takah chuan tun thlengin Covid-19 hri vei an la awm lo a, VLTF-te zarah an khua an inveng ṭhain himna an ngai pawimawh thiam a, hei vang pawh hi a ni ang thingtlang khaw tam tak chu an nun a zalenin dawrte hawngin hna pawh ṭhulh loin mihring nunphung pangngaiin an kal thei a ni thawthang a; hetihlaia an sikul kharsak reng mai hi zirlaite'n an tawrh avangin sikul hawn ṭan rawtna hi thil tih chi loh tawp chu a ni tawh lo ang.

Khaw tam takah chuan an inkhawm lo tih mai lo chu khawsak phung a danglam lem lo a, naupangte pawh an inkawmin an inlenpawh a, an khawtual nun pawh hri len hma nen a danglam tam tawh lo. He'ng khuate hi online-a class kal dawna kawng hrang hrang avanga harsatna tawk lian deuhte an ni fur a, hei vang hian School Education department rawtna anga hripui vei awm lohna khuaa sikul hawn phalsak hi thuneitu lam pawhin ngaihtuah a ṭha tawh awm e.