Ramri buaina leh kan dinhmun

Tun hnaiah Assam leh Mizoram ramri buai avangin ramria khuaten harsatna an tawk mêk a, Phainuam bulah Assam lamin Mizoram chhungah harsatna siamin Mizo leileta thlaite an tichhia a, helai bawrah hian buaina tenau a chhuah bakah bomb puak rite pawh hriat tur a awm.

Assam hian ramri chung­changah hian min zuam tawlh tawlh ni berin a lang a, Mizoram chhunga harsatna an rawn siam zel avang hian ramri buaina chhuak chinfel hi a harsa tawlh tawlh dâwn a ang. Heng buaina chhuakte hi chingfel pawh ni ila a aia harsa zawk ramri chinfel kan la hmabak a, hei phei hi chu thil harsa lehzual tur a nih hmel.

Engpawhnise tun dinhmunah hian Mizoram sorkar hruaitute hi an khawngaihthlak hle mai a, Assam chet dan an hmuh hian tharum nena na taka beih lêt nghal pawh an duh hial maithei. Chutihlaiin kan ṭhenawm state-te hi tharumin bei ngawt ila, kan duh ber Mizoram ramri a zauh phah loh chuan buaina awmze nei lo a ni palh thei a, dawihzep hauh si loa fîm taka ngaihtuah erawh a ṭul khawp ang.

Ramri buai kan tih hi ramria awm khuate buaina a ni mai lo a, state pahnih inkara buaina a ni a, a chinfel hna pawh hi ramria khuate kuta dah chi a ni lo. Heng khuate hi intibuaiin a chak zawkah pawh lo ṭang ta tehreng ila, kan duh ber leh ngaimawh ber ramri buaina chinfelna a la ni phak lo ang.

Hei vang hian ramri buaina chingfel tur chuan kan state pahnih hruaitute an inbiak phawt a pawimawh a, anni lam inbe mang si loa ramria khuate lo innawr chiam te, police leh police inbeihte leh silaia inkah hial pawh thleng mah se, a sawi fel theitu lamin an sawi fel hma chu ramri buaina hi chinfel a harsa hle ang.

Kan state hotu liante hian thil dang­ah pawh Assam lam hi an be fo a, tuna MNF party-te phei chu Assam-a rorelna vawnfung chelhtu BJP-te nen hian NEDA-ah thawkhoin vawi tam an lo inkawm tawh a; political party ṭhatna tur pawha an lo biak fo tawhte hi Mizoram tan a nih chuan ramri thilah hian an be hreh tur a ni lo ang.

Hotu liante indawr hmasa se, chumi thuchhuak azir chuan kal leh zel dan tur a hriatthiam theih ang a, inbiak boruakin thil dang hi chu hril se, kan ramri dik tak kan neih theihna tur a nih chuan kan inhuam deuh pawh a ṭul chho dâwn niin a lang ta.