Assam police leh Mizo hmeichhiate

MHIP General Head­quarters chuan Mizoram chhanna atan Mizo hmei­chhiate'n ṭangkaina an nei a nih chuan an tlanchhe dawn lo tih an puang a. Tun hnaia Buarchep phaia Mizote kutthlaktu Assam police an dem thu sawiin ram chhana ṭang ngam Mizo hmeichhiate an chhuang tih an sawi bawk.

Assam leh Mizo­ram ramri buai avangin tun hnaiah Mizo hmeichhiate'n kut an tuar ta fo mai a, kum 2018-ah Zophai buainaah Mizo hmeichhe journalist-in hliam a tuar tawh a, kum 2020-ah Mizo hmei­chhiate'n kawng an dang chungin Assam police hian tharum hmangin an tawn lui tawh a, tun hnaiah Buarchepah Mizo hmeichhiaten Assam police-te kut an tuar leh bawk.

Assam police lam chet dan hi a demawm takzet a, he thil thleng hi keini lam zawk tih ni se, Mizoram police hian ramri buainaah Assam hmeichhiate hi kut lo thlak ni se a chhe thei ang berin Mizote hi min timualpho duh ngei ang. Hei vang hian kan hmeichhiate chunga Assam lam chet dan hi a demawm a, kan demna thu tlangaupui ringawt hi a tawk lo a ni. Heng mite hi Assam sorkar pawhin an hrem ngei theihna tura nawr hi Mizoram sorkar mawhphurhna a ni awm e.

Mizo hmeichhia­te chunga thil thleng hi Mizoram leh Mizo mipuite zahlohna lian tak a ni a, kan hmei­chhiate pawh zuah loa Assam-in min zuam ta mai hi a tlawmthlak a; chutih rualin tharuma beih lêt nghal chiam hi thil finthlak leh ṭha ber a ni lo thei a ni.

Kan sorkar hian Assam sorkar hnenah he thil thleng hi thlenin kutthlaktu Assam Police-te hi hrem ngei se, hliam an awm a nih chuan hliam enkawlna senso pawh Assam hian tum ngei rawh se.