Lungleiin RT-PCR bun theihna Laboratory din an mamawh em?

Mizoram sorkar chuan RT-PCR for Chhimbialin Lungleia RT-PCR bun a nih theihna tura Gauhati High Court (GHC), Aizawl Bench-a public interest litigation (PIL) an thehluh chu titawp turin High Court a ngen.

Sorkar aiawhin Health Secretary chuan Lunglei bakah, Mizoram chhim lam district dang zawng­ah TrueNat khawl bun vek a nih thu a tarlang a, "TrueNat leh RT-PCR rintlak dan inang reng a ni a, ṭum khata sample test theih zat a intam hleih tih loh chu," tiin sample tam tham test tur a awm loh avangin chhim lamin an la mamawh loh thu an tarlang a ni.

Lungleia hman tura RT-PCR khawl hi a petu lamin a zir loh vang nge, tun thlenga bun a la nih loh bakah bun tuma nawrtute'n High Court hial an thlen pui hnuah pawh Mizoram sorkar chuan RT-PCR bun tumna a nei tak tak lo niin a lang. Hetihlai hian tunlaia hri leng mek Covid-19 endikna atan ṭha bera ngaih chu RT-PCR khawl hi a ni a, ṭhenawm state-in pali/ pangate an neihlaiin Mizoramah chuan ZMC, Falkawnah bak RT-PCR hmang hian hri vei leh vei lo hi endik a la ni lo.

Chhim lamin he khawl bunna tur laboratory an la neih loh chhan hi Mizoram sorkar chuan a sawifiah tawh a, hetihlai hian keini aia state te zawkte pawhin laboratory hi an neih fer fur tawh avangin thil ṭul lo leh ṭangkai lo chu a ni lo ang tih a rin theih.

Sum neih loh vang emaw, hun neih loh vang lamte a nih lem loh chuan Mizoram chhim lam mipuite in hmanṭawm theih tur, Covid-19 hripui a ziaawm hnu thleng pawha ṭangkai thei tur RT-PCR khawl bun theihna laboratory hi awm thei ngei se a ṭha ngawt mai.