Ṭanpuina khawnsak chungchang

Women and Child Development hnuaia Mamit District Child Protection Unit chuan, naupangte tawrhna remchanga hmanga mimal emaw, pawlin hlawkna tel tura ṭanpuina khawn phal a nih loh thu an tarlang a, hetiang tilui chu hrem theih an ni tih an tarlang tel.

Mizoramah tun hnaiah ṭanpuina pawisa khawn a tam hle mai a, he thil ṭha tak hi thil intihhmuh theih tak a nih avangin felfai tak leh dik taka kalpui ni zel thei se a ṭha hle. Thawk khatlai aṭang khan media kaltlanga midangte ṭanpuina thawhlawm khawn hi chin ṭan a ni a, hemi atan hian mi inphalte pawhin an thawh ṭhahnem thei hle a, mi tam takin an lo dampui tawhin an dinkhawchhuah leh theih phah a, thil ṭangkai tak a ni.

Hetihlai hian mi ṭhenkhatin a pawl zawk tihlar tum leh a khawntu zawk intihlansarh tum niawm takin thil an kalpui nia ngaih theih a awm ta fo mai a, hei erawh ngun taka zir chian a ṭha ang. Mi chhiat tawh leh harsatna tawh rual deuhthaw a ṭanpuitu lam lo inlar nghal ṭhin hi a lawmawm rualin, a pawisa petu ni lem loa a khawnsaktu/kutdawh saktu lam an rawn inlar nauh nauh ṭhin hi chu an intihsiak pawh a ang ta lek lek mai.

Thil ṭha tiha midangte ṭanpui hi kan intihhmuh zel tur a ni a, chutih rualin kan kalpui dan leh kan kalphung zawk hi uluk hret hret ila. Midangte chhiat tawh leh harsatna tawhah a pawisa petu lam ni lem lo a, a khawnsaktu pawl kan tam ta lutukte pawh hi thil fel ber a ni lo thei a, a pawimawh ber erawh chu kan khawnsakte hnenah dik leh fel fai takin a thleng em, tih hi a ni awm e.