CM-in Covid-19 hluar chhanah Raltlante a puh em ni?

July 13-a Prime Minister hoa hmar chhak state Chief Minister-te'n Covid-19 dinhmun chungchang an sawihonaah Mizoram Chief Minister chuan Mizorama Covid-19 hluar chhanah khawchhak aṭanga raltlante a puh niin Mizoram Pradesh Congress Committee (MPCC) chuan thuchhuah an siam a, hei hi pawi an tih thu an tarlang.

India ram media hrang hrangah Mizoram Chief Minister thusawi hi tarlan a ni a, chutih rualin a thusawi hi a tluana dah a nih loh avangin eng ang takin nge a sawi tih erawh hriat a harsa hle. Kan state hotupa thusawi hi media lamin an put darh duh chi tak a lo nih ve bawk avangin a darh ta hluai niin a ngaih theih. Chutih rualin a sawi ngei a nih erawh chuan an ziak chhawng a, a darh ta vak pawh hi a mak lo.

Thusawi reng reng hi an sawi chhuah dan leh an tlip dan nen a tluantlinga hriat loh chuan a nihna baka sawi chhawn hi a awm thei a, hei vang hian kan state hotupain Myanmar aṭanga Mizorama raltlante hi Covid-19 hluar chhanah hian a puh tak tak nge tak tak lo tih pawh hriat fuh a harsa a ni.

Chutih rualin media hrang hrangin an put darh tura thil a lo awm hi chu a vanduaithlak hle a ni. Khaw chhak aṭanga Mizorama kan unau raltlan zingah Covid-19 hri kai hi an awm ngei a, chutih rualin Mizorama hri pu darhtu anga puh chu thil tihchi a ni lo ang.

Engpawhnise politics aṭanga thlir a nih tawh chuan thil hi a lai mawh tawh ṭhin. Congress lamin Chief Minister thusawi nia an puh hi chuan national media thlengin sawi chhawn a hlawh a, chutihlaiin he thu hi kan Chief Minister hian a lo sawi ri palh a nih pawhin a sawi dan tluantling, a sawi chhan leh a tlipna lam hriat chian phawt loh chuan Mizoram chhunga indemna rawngkaia put darh zel loh pawh a la ṭha zawk awm mang e.