Aizawla bawhhlawh paih leh mipui
Aizawl khawpuia bawlhhlawh paih buaipuitu Aizawl Municipal Corporation (AMC) chuan bawlhhlawh ṭawih thei leh ṭawih thei lo thliar hran chu November aṭangin a takin a kalpui ṭan ta. Solid Waste Management Rules, 2016-in a phût angin Solid Waste Management Center (SWMC), Tuirial-ah paih vek tawh tur a ni a; a nih dan tur ang taka sâwngbâwl leh enkawl a nih theih nan bawlhhlawh ṭawih thei, ṭawih thei lo, plastic, e-waste leh mihring tana hlauhawm theia ngaih hazardous waste-te chu thliar hran tur a ni.
Tun hnaia Aizawla chhungkaw tam tak buaina chu bawlhhlawh thiar hran leh a paih danah a ni. Thil thar a nih miau avangin bawlhhlawh paih danah hian hun eng emaw chen chu buai deuh nak a awm lo thei lo ang. AMC lam hi chuan Aizawla local council tinte chu tih dan tur a lo zirtir tawh bakah AMC councillor leh official-te'n mipuiah awareness campaign a nei ṭhin a, August 2019 aṭangin LC 19-ah an lo enchhin tawh bawk a ni.
He ti chunga chhungkaw tin deuhthaw kan la buai avang hian bawlhhlawh paih dan inzirtirna hi tun aia uar zawk leh mipui hriatthiam tlan theih tur deuha kalpui hi a ṭul takzet a. AMC lam leh bawlhhlawh paih kawnga a thawhpui LC lam hian tiṭha thawkhatah inngai mah se, a mipui berin zawm harsa kan la tiin kan la phek buai deuh niin a lang. Bawlhhlawh thliar tur chi hrang tam ta lutuk hian harsatna a siam nasa deuh ber niin a lang a, a thliar tur zat indaih tur bawlhhlawh bawm chi hrang inkim sem hial pawh a ṭha mai thei e.
A taka hmangtu tana hriatthiam harsa leh mipui tam zawk buaina thlen thei tura ruahmanna a awm a nih chuan, a ruahmanna lam hi a la fel fai tawk lo a ni ang tih pawh AMC lam hian pawm ngam se a ṭha a; 'mipui' hi chuan lehkhathiam leh thiam lo zawk te, a fing ber aṭanga buaipui ngai deuhte a huap vek avang hian bawlhhlawh paih dan inzirtirna hi tun aia ṭha zawka kalpui dan ngaihtuah a ngai hle. Mipui an buai tak em avang hian bawlhhlawh thliar loa paih leh tur tihna lam ni loin, inzirtirna ṭha zawk leh ruahmanna fel zawk ngaihtuah chhuah a ngai e.