Engtin nge kan kal zel ang?

July 17 zanlai aṭanga July 24 zanlai thlenga Covid-19 chungchanga inkaihhruaina chu Mizoram sorkar chuan a tichhuak leh a. Aizawl Municipal Corporation huam chhungah khauh lehzuala inkhuahkhirh turin ruahmanna siam a ni a, Local Level task Force-te hnathawh tur leh ṭangkaina pawh a hma aiin a sang tawh zawk dawn a ni.

Mizoramah Covid-19 positive an tlahniam thei lo a, nitin an pung zel zawk a tih theih a, hei vang hian sorkar pawhin a hma aia khauh zawka lockdown kalpui a rel leh ta. Hei hi mi tam takte duh dan a ni ngei ang a, chutih rual chiah chuan hnathawk thei loa inkhung hi thla bi hlawh lak tur nei ve lo mi tam takte duh loh dan a ni tel ve leh bawk ang.

Sorkar hotute tan pawh rel thiam harsa khawpin kan dinhmun hi a harsa tawh a, April thla aṭanga inkhuahkhirh tawh chunga kan state dinhmun en hian kan kalphungah hian fuh tawk lo lai a awm tih chu pawm ngam a hun tawh ang. Kan test dan kalphung emaw, kan lockdown kalpui dan fuh tawk lo emaw, kan inven danah emaw a dik tawk lo awm hi sorkar pawhin a pawm a hun ta.

Tuna lockdown khauh zawka kalpui tur hi a zawh hunah kan Covid-19 positive dinhmun hi tlahniam thei si lo se engtin nge kan kal zel ang, tih pawh ngaihtuah lawk a ṭul ta khawp mai. Lockdown a zo a, kan beisei angin thil a kal loa a hma aia khauha lockdown kan han rel leh ngawt zel a, hemi piah lamah hian ruahmanna ṭha tak a awm thei ang em?

Kan sorkar hian Covid-19 hma­chhawn dan turah hian mithiamte rawn tam se, ngaih­dan leh duh dan khawn khawm kual nasa lutuk loin mithiamte rawtna angin kal thei ila. Kan mithiamte pawhin July 24 hnu lama kal dan tur ruahmanna hi tun aṭangin nei thei se, a dawn hnaia rel chawp ringawt chu a ṭha tawk lo a ang ta hle a nih hi.