Sum sem tur a awm chuan Tun hi sem hun tak a ni

Congress ṭhalai chuan thuchhuah siamin total lockdown avanga eizawnna buai mek leh chhawmdawl ngaite chhawmdawlna sum pe turin Mizoram sorkar an phût a; sorkar hnathawk ve lote eizawnna buai vekin April 20, 2021 aṭanga vawiin thlenga inkharkhip a ni a, hemi chhung hian sorkar zem zen ve lote tan sorkarin thla­muanpui tham rua­hmanna a la nei loah ngaiin miharsate ṭanpui turin sorkar an phût.

Mizoram sorkar hian total lockdown a puan chhan chu miretheite retheihna belchhah turin emaw, khawpuia sorkar hnathawk ve lote eizawnna tibuai turin a ni lo a, hripui leng mek a lo ziaawm theihna turin a puang a ni. Chutih laiin he total lockdown hian ken tel a neih chu mi tam tak eizawnna a tibuai a, mi harsa zawkte harsatna a belchhah tlat mai hi a ni a, hei hi sorkar pawhin hriain pawi a ti hle tih vawi duai lo a lo sawi tawh a ni.

Total lockdown a puan nawn chhen avang ringawt hian sorkar hi dem tur an ni lo a, mipuite himna duhtu sorkar a nih avangin a thutlukna siamte pawh hi kan hriatthiampui a ṭul hle. Chutihlaiin sorkar hian ruahmanna dang a siam theih chu miharsa zawkte chhawmdawlna tur (relief package) lam hi a ni a, hei hi state pakhat sorkar ve riang ruang tan chuan ngaihtuah theih loh tawp tur a ni hauh lo ang.

Sorkar sum kan hmuhte hi a hmanna tur awm sa tih ni bawk mah se, kan Chief Minister leh Finance Minister-in a lo sawi tawh angin 'budget chu duh chuan bai theih, duh chuan kan theih' a ni a, chumi awmzia chu sorkarin ṭha a tihnaah kan sum neih ang angte hi a hmang thei a ni. Hei vang hian kan sorkar hian he hun harsa takah hian a mipuite tawrhna hi a hrethiam a nih chuan anmahni khai chhuahna tur ruahman hi a ba takzet a ni.

Kan sorkar sum dinhmun enin mipuite duhthusam ang relief package pek chhuah hi thil theih a ni lo mai thei a; nimahsela sorkar hian a tum tak tak a nih chuan a pawisa dah hran sa aṭang pawhin a ruahman thei a ni. SEDP atana pawisa a dahte pawh hman theih a ni ang.

Sorkar hian sum sem hi a la tum a nih ngai chuan inthlan lo awm leh tur dawn hnaia sem loin, tun hi mipuite mangan harsat lai tak a ni a, ṭanpuina sum awm thei ang angte sem chhuah hun tak a ni awm e.