Mipui tha chakna hman ṭangkai

Mizoram sorkar chuan Aizawl khawpui huam chhungah Covid-19 hripui darh zel tur venna atan total lockdown a kalpui leh mek a; tun ṭum lockdown-ah hian a hma aia khauh zawka inkhuahkhirh a, mipui pawn chhuak tur mahni huam chhung ṭheuha veng turin Local Level Task Force-te a sawm.

Local Level Task Force-te hian sorkar lam sawmna hi an zawm ṭha hle mai a, Aizawl khawpui bikah mipui veivak an awm mang lo a, task force lamin mahni veng chhung ṭheuh taima takin an veng a ni. Veng tam tak chuan an veng luh chhuahna hmun pawimawh deuhah hrui thlungin mihring leh lirthei veivakte an endik a; zingkar aṭanga zan thlengin duty an insiam bakah inkaihhruaina hrang hrang mipuiah hriattirin aurinna hmangin zirtirna an kalpui reng bawk a ni.

Kum khat chuang hripui avangin kan buai tawh a, sorkar tha leh sum pawhin a daih tawh lo tih a takin kan hmu. Chutihlaia mipuite tha chakna hmang thiam a, task force nena thawhhona ṭha zawk leh chak zawk nei tura ruahmanna siam a ni hi a lawmawm a. Covid-19 thawh hnihnaa lockdown kan kalpui tawh dang zawngte aiin tun ṭumah hian inkhuahkhirhna leh inkaihhruaina pawh a ṭha zawk niin a lang.

Mi tam tak ei­zawn­na tibuaia a hming maia lock­down puan a nih khan pawn chhuak thei leh veivak thei an tam em em a. Veng chhungah inlen pawh an awm reng bawk avangin Covid-19 positive an pung zel a tih theih a; tun ṭuma ruahmanna thar siama khawtlang hruaitute nena ṭang ruala lockdown kalpui hian hripui venna kawngah rah ṭha a chhuah ngei a beiseiawm.