Covid-19 vei chhuahtir dan thar

Covid-19 vei, natna lang lo leh natna lang nasa lo (mild/moderate symptom)-te chu swab sample endik nawn loin ni 10 hnuah chhuahtir ṭan an ni. Revised Discharged Protocol for Covid Patient hi WHO bakah USA leh South Korea CDC leh ICMR ngaihdan a ni a, Mizoram pawhin hei hi a zawm ve dawn niin Health department official-te chuan an sawi a, a him tawkah an ngai a ni.

Hun rei tak chhung Covid-19 in min chenchilh hnu­ah Covid-19 veite enkawl an nih hnuah chhuahtir dan thar hman ṭan a ni dawn a, hei hi mi tam takin an sawisel. Covid-19 positive an ni tihte an negative tih finfiahna awm loa chhuahtir hi a him loh theih dan sawi a tam a, hetianga sorkar a chet chhan hi test nawn lehna sum a heksak vang leh sorkar sum senso tihhniam tumna vang, ti zawngin social media lamah an bei lêt nasa hle a ni.

Hetihlai hian he chhuahtir dan thar hi Mizoramin an duan a ni lo a, khawvel huapa mithiamte'n a ṭha leh him tawka an ngaih a ni. Mi pangngai (layman) thlirna aṭang chuan Covid-19 vei tawhte an negative tih finfiahna tel loa chhuahtir mai hi a la hlauhawm hle ang tih a chiang a; nimahsela a thiam zawk leh a hre chiang zawkte'n a him tawka an ngaih hi chu pawm tlan mai a ṭha ang.

Tuna Mizoram sorkarin 'Revised Discharged Protocol for Covid Patient' a hman tur hi hmun danga an tih ngai loh leh keimahni mil tura duan bik a ni lo a, khawvel hmun dang leh India ram state dangah pawh an lo hman tawh a ni. Mithiamte'n a ṭha leh him tawka an ngaih a nih avang hian hre chiang loa lo hnial mai loin a hre zawkte ruahmanna hi ngaih ngam takin i zawm phawt mai ang u.