SEDP hnuaia ṭanpuina sem

 Social Welfare minister chuan a enkawl department chuan SEDP hnuaiah ṭanpuina an sem theih ṭep tawh thu a sawi a, eptu lamin 'Khawnge cheng nuai 3 in sem tur chu?' tia an nuihzat ṭhin thu sawiin, "Pathian zarah ka enkawl AH & Vety, Fisheries leh Sericulture dept. chuan SEDP hnuaiah ṭanpuina sem theih turin kan peih ṭep tawh. District tinah a dawng tur thlang chhuak tur DC kaihhruaina hnuaiah selection board din a ni tawh," a ti. 

SEDP hian sawi a la hlawh chho dawn chauh a, he mi hnuaia ṭanpuina sum an sem chhuah hma hauh pawhin sawi a hlawh tawh. Chief minister hian Assembly inthlan hma khan mipuiin cheng nuai thum an dawn tur thu hi chiang takin a sawi a, a video-te pawh nasa takin a darh. Mipui lam pawhin ring tawkin an vote tling ta a, cheng nuai thum dawn ngei hi an beiseiin an phût tlat ang. 

Hetihlai hian sorkarna an chan hnuah MNF lam hruaitute aṭangin SEDP chungchang chiang faka sawi chhuak hi an la tam lo hle mai a, kan minister-te ngei pawhin a pawisa sem dan tur lam hawi zawng hian an sawi ri mang lo. Minister ngeiin AH & Vety, Fisheries leh Sericulture department lamin SEDP hnuaiah ṭanpuina sem theih turin an peih ṭep tawh tih vantlang hriata a sawi chhuak hi thil lawmawm tak a ni. 

Thil sem ṭhat leh ṭhat loh thua inhnial a hun tawh lo a, nuai thum sem tuma inzuarten ro an rel tawh avangin mipuiin SEDP kal tlanga cheng nuai thum dawn hlan hi an nghakhlel tawh hle a ni.