Mass testing

Tunlai hian Mizoram sorkar chuan Covid-19 hluarna hmun ṭhenkhatah mipui nawlpui endikna (mass testing) a kalpui mek a, Covid-19 positive pawh eng emaw zat hmuh chhuah tawh a ni.

Mipui ṭhahnemngai leh pawl ṭhenkhat pawhin mipui nawlpui test a ṭulzia hi an lo aupui fo tawh a; nimahsela chhan hrang hrang avangin hei hi kalpui theih a ni lo a, mi tam takin he thil avanga sorkar an dem pawh hi a mak hran lo. Tun hnaiah sorkar chuan lockdon khauh zawka kalpui a rel a, chumi chhung chuan mass testing a kalpui tel nghal a, hripui vei eng emaw zat an hmu chhuak ta reng a ni.

Total lockdown a hminga puang ve siin khawlaiah mipui veivak hmuh tur an awm reng ṭhin a, hmun ṭhenkhatah chuan traffic a jam hial a, mi ṭhahnemngaite'n khauh zawka inkhuahkhirh an duh chung pawhin sorkar lamin 'chhuak thei leh hnathawk thei' list thui tak a tlar dul reng a, lockdown avanga mi tam tak eizawnna kan tibuai chung khan hri do kawngah kan lockdown khan a thawh hlawk vak lo a nih hmel. Tunah erawh khauh zawka lockdown kalpui a nih mai bakah mass testing kalpui a ni a, rah ṭha a chhuah ngei i beisei ang.

Mass testing-a hripui vei hmuh chhuah tharte hi test ni loin hmuh chhuah ni lo ta se mi engemawzat an lo kai darh hman thei a, kan dinhmun ṭha lo sa hi tun aiin a chhe zual thei a ni. Hei vang hian sorkar ruahmanna siam thar hi a lawmawm a, mi tam tak duhthusam leh rawtna ni sa reng, sorkarin a kalpui theih si loh kha tunah chuan a takin a kalpui ta a, tlai deuh tawh mah se tih loh ai chuan a ṭha zawk hle a ni.

Sorkar hian total lockdown hi eng chen nge a kalpui dawn hriat a ni lo a, khawpui pumpui lockdown hi thlah a nih hnuah pawh hri hluarna hmun bik hi chu khuahkhirh zel ni se, chumi chhungah chuan mass testing hi kalpui zel ni se, he hripui dona atan hian a sawt ngei ang.