RT-PCR laboratory pakhat leh RAT test
Health department chuan tun laiin Covid-19 hluarna hmun hrang hrangah Rapid Antigen Test (RAT) hmangin mass testing a kalpui mek a; hetihlai hian Covid-19 hrik hmuh chhuahna atana rintlak zawka ngaih RT-PCR khawl hmanga endik theihna laboratory chu Mizoram pumah pakhat chiah a la awm.
Tun hnaiah sorkar official kan mithiamte hnen aṭangin RAT a rintlak dan sawifiahna chhiar tur, ngaihthlak tur leh en tur a awm nual a. Hetihlai hian khawvelin Covid-19 hri dona atana khawl rintlak zawka a ngaih (gold standard) chu RT-PCR a ni thung a; RT-PCR sawi mawina leh ṭhat zawkna thu hi kan sorkar mithiamte hian an sawi ri khât ta hle. RT-PCR hmanga endik hi a senso a sang zawk a, chumi piah lamah he khawl hmanga laboratory-a endikna pakhat chiah kan la nei a, thawktute an hahin an indaih lo hle tih mipui pawhin kan hre tlang a ni.
RAT hmanga positive hmuh chhuahte hi positive dik taka ngaih tur tiin mithiamte chuan an sawi a, chutihlaiin RAT hmanga negative zingah a hmuh sual (positive ni si) an awm ve thei bawk niin an sawi. Hei vang hian duhthusamah chuan RT-PCR zel hi hman theih ni se tih a nihlaiin Mizoramah chuan a tam zawk hi RAT hmanga endik kan ni a, hei hian chhan tam tak a nei ngei ang tih a rin theih.
Mizoram sorkarin tun thlenga RT-PCR laboratory a la din belh thei lo hi hriatthiam a harsa takzet tawh a, harsatna tam tak a sawite hi a dikna chen awm tho mah se 'a tum tak tak loh vang' a ni tih hi chu phat rual a ni lo ang. Keini aia state tê zawk pawhin an din thei a, private-a laboratory din tawh ṭhahnem tak an awm mai bakah Mizoram sorkarin ZMC lama laboratory a siam dan en mai pawh hian state pakhat sorkar ve riang ruang tan chu laboratory din belh hi thil harsa a ni lo ang.
Tunah chuan hmanhmawh thil bika hman tura an duan RAT chu kan inendikna atana hman ber a lo ni ta a, hei hi a 'awlsam zawk' vang leh 'a senso a tlem zawk vang' mai a ni ang tih a hlauhawm a, a him zawk leh rintlak zawk RT-PCR hi a tam thei ang hman ni se, laboratory pawh hi din belh ni ngei rawh se.