Health department pawisa dah zat

Khawvel pumah Covid-19 hripui a léng mek a, hei vang hian India ram pawh a buaiin Mizoram pawhin kan tuar nasa hle a ni. Hripui leng tur hriat lâwk a nih hma kum 2020-21 budget-a Health department-a sum dah aiin hripui a leng tawh tih hriat hnu 2021-22 budget-ah Mizoram sorkarin sum a dah tlem zawk a ni.

Annual financial statement aṭanga a lan danin kum 2020-21 chhung khan Health department-ah hian cheng nuai 62,632.39 dah a ni. Hripui a len hnua budget pharh takah hripui dona atan sum tam zawk dah a rinawm tawh laiin a hma kum aiin a tlem ta zawk a, cheng nuai 62,373.62 dah a ni.

Finance minister budget speech kha kan keu lèt chuan, sorkar kum chhunga thil ngaih pawimawh tur zingah mipui vantlang hriselna lam hi a lang lo a, chu mai chu ni loin Covid-19 dona lam sawi lan a ni lo. Hei hi budget buatsaih laia Mizorama hripui dinhmun a ziaawm hman deuh vang pawh a ni thei a, a chhan chu eng pawh ni se hripuiin min tuam mek laia ngaih pawimawh tur zinga hripui dona lam a sawi ri lo leh, a pawisa dah zatah pawh ngaih pawimawh a ni lo tih lo lang chhuak hi a ram pumin kan tuar mek niin a puh theih.

Tunah hian kan beisei aia nasain hripuiin min bei ta a, hri leng hi tute vang mah a ni bik lo a, khuarel thil lo thleng a ni a; nimahsela a do letna tura sum kan indaih lo erawh sorkar thiam loh a ni. Mass testing kan kalpui theih lawk loh chhan kha a ṭha kan tih loh vang ni loin sum lama kan harsat vang a ang a, hri vei enkawlna lama kan indaih loh a hlauhthawnawm thu thlengin kan ram hruaitute'n media hmaah an sawi chhuak a ni.

Hripui dona atan hian sorkar sum awm ang ang hi pawhkhawm theih chu ni tehlul mah se, Health department tana hman theih tur sa pawisa dah a tlem hi kan tuar mek a; state-in pawisa a neih loh piah lama hripui dotu ber Health department-in pawisa a neih loh nghawng hi kan hripui dinhmunah a lang chhuak a ni mai lo maw?