Assam sorkar chêt duh dan

Assam Police-te chu Vairengte daiah dan loa lo lutin Vairengte auto rickshaw stand-ah awmin Mizoram Police-in an duty-na tura an in sak chu hneh chhuh an tum a, hemi lo dang tur leh Mizoram ramri humhim tura inkahna thlengah thi leh hliamte awmin sorkar laipui inrawlh hnuah police-te pawh an inthiarfihlim leh ta a ni.

Assam hian Mizoram nena ramria buaina an nei ang bawk hian hmarchhak state dangte nen pawh ramri buai hi an nei a, tun hnaiah Mizoram hi an zuam bik emaw tih turin kil tinah an rawn nawr a ni ber mai. Assam mipuite'n ramri zauh tumin an rawn nék a ni lo a, Assam sorkar tirh official-te'n silai hmangte leh thuneihna hmangin Mizoram chhungah harsatna an rawn siam ṭhin a ni.

Heng thil thlen chhan hi ramria buaina kan neih vang mai niin a lang lo a, Assam inthlang tur leh chu inthlan kal zel nghawng nia puh loh theih loh khawpin thil a kal a, Assam sorkar thar leh an thuneitute hian Mizoram lamah hian ramri zauha na taka nêk tumin thutlukna fel tak an siam a ang hle.

Hei vang tak hian Mizoram tan pawh mahni ram chin humhalh tura ṭan lo khawh hi tihmakmawh a ni a, kan ram chhungah ngei silaite nen lo lutin harsatna an rawn siam a, civil mite hial kut thlakin silaite an hmet puak a, heti taka kan state ṭhenawm leh state lian zawkin min rawn bei mai hi hriatthiam a harsa hle a ni.

Kan châkkhâi lamna kawngpui ber an nih avanga tawlh reng tur kan ni bik lo a, kan ram chhunga luta kan sipaite awmna tura sak ngei pawh min hneh chhuh tumtute lo do let hi kan tihtur a ni. Silai hmet puaktu leh civil mite kutthlaktu Assam Police-te hian anmahni duhthuin heng hi an ti lo a, thuneitu sang zawkte'n an tirh vangin heti hian an che ta a ni a, Mizoram chhunga Assam sorkar rawn chet duh dan hi a demawm takzet a ni.