Fimkhur taka ṭan rual hun

Tun hnaiah Assam police leh sorkar official-te chu Vairengte daia Mizoram chhungah lo lutin CRPF duty post chu hneh chhuh an tum a, Vairengte khawtlang leh Mizoram police-te nen an inhmachhawn hnuah silai an hmet puak hmasa a, he mi chhang leta silai puakah Assam lam hi mi paruk an thi a, hliam eng emaw zat an awm bawk.

Vairengte daia thil thlengah hian Vairengte mipuiin fak an phu hle mai a, ramri buaina chungchanga a tir aṭanga tun thlenga an chêt danah an huaisenzia leh ram an hmangaihzia a takin a hmuh theih. Ralthuam nei lo mipuiin silai ṭha keng Assam police-te an hmachhawn ngam a, hei hi ram chhan vang leh Mizoram humhim tumna vang a ni a, an fakawm hle a ni.

Hetiang hunah hian kan ṭanrual thiam a ṭul a, tlema hmanhmawh deuh leh ṭhahnemngai fâl deuhte'n kan police-te che lawk lo an demna thute social media-ah an vawrh darh hman a, hengte hi inkhap sen ni lo mah se; kan inzir a ṭha khawp mai. Chumi piah lamah silai hmeh puah a nih hnua kan police-te chet dante leh a hnua an awm zui dante thlengin video hmuh tur a awm a, a ṭhente phei chu police-te ngeiin an lak leh vawrh darhte pawh a ang. Heng video-te bawk hi Assam lam state hruaitute'n social media-ah tidarhin min dem letna atan an hmang zui a, news channel hrang hrangin remchangah an lo hmang ve vat bawk.

Tunlai khawvelah social hman dan inzirtir hi thil theih a ni tak tak lo a, khawtlang ram changkang kan tihte pawhina harsatna an tawh a ni ve tho a, chuvangin Mizoram lam pawh kan indem emaw, kan insawisel vak vak a sawt kher lo ang. Chutih rualin kan ram hruaitute, kan sorkar mi leh sate bik erawh fimkhur thiam se, ramri buaina thil thlenga lansarh ve zel kan tum luatah kan thlalak thehdarh ṭhenkhatte hi min vaw lettu a chang ve palh thei.

Social media lama Mizoram hmingṭhatna tura kan ṭanrual thiam dan te, hnam dang ṭawng thiamte pawhin kan thiamna hmanga thudik puanga Mizoram dinna a dik zawkziate thlenga an thehdarh chuai chuai hi a lawmawm a; tun hi fimkhur taka ṭanrual hun dik tak a ni e.