Covid-19 dinhmun ziaawm thei lo

Mizoramah Covid-19 vei hmuh chhuah thar an awm zel a, tun hnaiah a ni telin an pung a, ni khata hripui vei mi 1,000 chuang hmuh chhuah châng a awm zauh zauh bakah hripui vei enkawlna damdawi-in khumte pawh a khat zo a ni.

Hetianga kan kal zel chuan kan hmalam hun hi a thim hle tiin a ngaih theih a, thlirna lehlam aṭang chuan hun thim ber kan paltlang chho mek a, ziaawm lam kan pan thuai a beiseiawm ve bawk.

Kan rama hripui vei an pun zel chhan­ah hian dem tur zawn dawn chuan dem tur tam tak an awm thei ang; sorkarin nawrna nasa tak kara mass testing a kalpui tlai lutuk te, eizawnna tibuai tur tinga lockdown puanga mipui zalen taka an veivah theih hun rei lutuk te pawh kha a puh theih ngei ang a; nimahsela tunah chuan hma kan sawn theih dan lam ngaihtuah a hun ta.

Tunah hian khawtlang mipui chakna nen ṭang kawpin hripui hi do mek a ni a, CCCC awm lo phei se sorkar hmunhma leh sumin hripui dona hi a daih tawh lo ang, tih theih hial a ni. Hri vei enkawl ngai zinga ṭhahnem tak chu khawtlangin a enkawl a, a senso a tum vek bawk a, sorkar pachhiatzia enin sorkar aṭanga beiseina neih lêt lam aiin khawtlang ṭan rual lehzual hi a pawimawh dawn hle a ni.

Hripui vei endikna kawngah RTPCR laboratory din a tum dan leh harsatna a siam dante enin beisei a chau tawlh tawlh a; a endikna lamah ṭan a la chak thei lo a nih pawhin hri vei enkawlna lamah tal ṭan a lak lehzual a ngai ta. Hripui vei enkawlna hmunhma ṭhahnem zawk buatsaih a ṭul a, ZMC ringawt lo deuh hripui vei enkawlna tur bik buatsaih a hun tawh hle a ni.

Mizoram puma Covid-19 avanga damlo na zualte hmun khata phurh khawm tum hi a senso a hautak bakah damlo tam tak tan chauhpui lehzualna hman a tling ang.

Covid-19 dona kawngah sorkar tan thil ṭul zawng zawng tih sen a ni lo a, a sum leh mihring neih zat pawhin a daih kher lo ang a; nimahsela Covid-19 vei enkawlna tam zawk buatsaih erawh tih­makmawh a ni ta.