Kolasib Bawrhsap ngenna

Kolasib DC chuan Vairengte dai ramria police duty-te chu tlawh tam lo turin mi tin a ngen a, ramria police-te duty tiderthawng thei tur chi thlalak leh video thehdarh lo turin a ngen bawk. Tun hnaia ramria inkahna thleng chungchang sawiin, "Chan ṭha zawk chang kan ni a nih pawhin, nunna hial channa thil thleng hi chapopui lo a, mitthi chhungte ngaihtuah tel chunga kan chet zia leh ṭawngkaah inngaihtlawmna leh lainatna tihlan a pawimawh," a ti.

Vairengte daia inkahna thlengah Mizo mipuite in­thurualna leh in­pumkhatna ṭha tak kan hmu a, Vairengte mipui huaisenzia leh kan police-te duai lohzia pawh kan hmu tawh. Chutih rualin kha thil thleng kha hmelma nena inbeihna thil a ni lo a, Assam politician-te'n an nawr luih avanga police leh police inkara inkahna thleng a ni tih hre chunga Kolasib DC ngenna anga chapo lo leh mawi taka lan thiam hram hram a pawimawh ang.

Ramri tlawh lo tura mipui a ngenna pawh hi zawm a ṭha hle mai a, sorkar mi pawimawhte leh media lam mite leh NGO hruaitute pawhin an tlawh nasa tawh a, hemi baka mahni bengvara lo tlawh ve sek loh hi thil ṭha tak a ni ang. Tun hnaiah lansarh (publicity) beisei avanga hetiang thil thleng remchanga hman tumte leh mahni social media lam tihlarna atana hman tumte thlengin a awm theih a, heng thil hi ramri buainaah hi chuan inrawlh lo se a ṭha hle ang.

Social media lama thu thehdarh chungchangah pawh Kolasib bawrhsap ngenna hi zawm hram hram ila, thil thleng kan hre tlang tawh a, a thlen chhan leh a thlen dan pawh kan ram hruaituten a kimchangin an sawi tawh. Hre fiah bik leh hre ṭha bik ang maia a sawi belhna lam video leh thlalakte social media-a thehdarh kawngah insum tlang ila, tunah chuan kan chet sual chang reng an awm tih hriain fimkhur leh fing taka awm i zir tlang ang u.