Kar khat dang lockdown

Mizoram sorkar chuan Aizawl Municipal Corporation huam chhunga total lockdown kalpui mek chu kar khat dang atan an pawtsei a, August 7 zanlai dar 12:00 thleng Aizawlah inkharkhip tur a ni ang. Total lockdown pawh sei tur thu hi Health Minister hoa rel niin sorkar mi pawimawhte bakah Indian Medical Association, Medical Operational Team, Jt. NGO Coordination Committee leh Mizo­ram Kohhran Hruaitute Committee leh Local Task Force aiawhte an tel.

Aizawl khawpui hi ni 100 chuang a in lockdown ta a, hripui lengin ziaawm lam a pan thei lo a, hei hi mipui thiam loha puh loin sorkar hian mawhphurhna a lak ngam a hun ta hle. Hripui leng a ziaawm deuhin sorkar hruaitu zingah 'kan sorkar chak tak hmalakna' ti zawnga sawi an awm hman deuh ziah a, chuti a nih chuan hripui darh zel leh ziaawm hleithei loah pawh hian mawh an phurh ngam a ṭul ang.

State dangah pawh hripui a leng a, mi tam zawkin an thihpui a, damdawi-in leh oxygen pawh indaih loin an awm a; nimahsela hmalakna langtlang leh awmze nei an kalpui a, hma an sawn khawp mai. Mizoramah chuan mi ṭhahnemngaite'n lockdown khauh zawk an rawt laiin Aizawla traffic jam theihna lockdown kalpui a ni a, a hlawma test neih (mass testing) an rawt lah chu, 'hri vei enkawlna kan indaih lo ang' an tih vangin kalpui a ni lo.

Tunah chuan India rama positive nei thar tam zingah kan lang a, mihring kan tlem tehlul nen hripui vei mek (active case) nei tam zingah kan lang ta reng bawk. Heng zawng zawng hi state dangte neih ve loh hlawh nei loa inpe VLTF/ LLTF ṭha tak kan nei chunga thleng a ni. Khawilaiah emaw thil rel fel tawk loh a awm tih a chiang ta hle.

Lockdown pawhsei hian eizawnna na takin a nghawng zel a, miretheite retheihna a belhchhah avangin total lockdown ni kher loa hri do dan rawtna hrang hrang awm ve bawk ṭhin mah se mi thiam (health expert & economist) kal khawm ni loin ro an rel ṭhin avang pawh a ni mai thei e, 'lockdown pawhsei leh ni phawt mai se' tih bak hi kan hotute hian an la rel thei lo a ni ta ber. Khawpuia miretheite (urban poor) retheihna belhchhahin a awm a ni mai lo a, thingtlang thlai thar chhuah tam vanglai taka Aizawl kharkhip hian thinglang mite na takin a nghawng tel a ni.

Kar khat dang atan lockdown pawhsei a ni leh a, roreltute hian kan zavai atana ṭha ber tura an ngaih a ni a, thuawih takin mipui­te'n zawm leh phawt ni se; kar khat liam hnuah, 'hri leng a pun zel avangin lockdown pawh sei leh a ni' ti ringawt lo deuha mithiam (health expert & economist) ngaihdan leh zirchian­na mila awmze nei zawk rorelna kan hmuh tawh i beisei ang.