Aizawl sumdawngte dinhmun

Sumdawng pawl hrang hrang 70 chuang awmna, Mizoram Business Co-ordination Committee (MBCC) chuan nimin khan ṭhutkhawm hmanhmawh neiin Mizoram sorkarin Aizawl khawpuia total lockdown a pawtsei chu ṭha an tih loh thu leh an duh loh thu an chhuah a; sorkar chu August 3 hmaa total lockdown sût tura an ngen bakah August 2 aṭanga lungawi lohna lantira flag dum tar an tum thu an puang.

Sumdawng pawl­ten an harsatna an sawi hi anmahni thlirna zawn aṭang chuan a dik hle mai a, mahni eizawnna chhunzawm thei loa in siam hi chu thil hrehawm tak a ni ngei ang. Kum 2020 pumpui deuhthaw bakah kum 2021-ah pawh ni 100 chuang khuah­khirhna kalpui hi mipui leh rethei zawkte rahbehna leh ding khaw chhuak zo tawh lo tura awpbehna nia an ngaih thu an sawi hial a, "Nitin ei chawp zawngte leh kut hnathawktute tana phurrit nasa thei tur ang bera ruahmanna siam niin a lang," an ti.

Thil lang chiang reng chu total lockdown reltute hi inkharkhip avanga an sum lakluh danglam ve mang lote an ni deuh vek a; sorkar hnathawk leh kohhrana hun puma thawktute hian hripui lenlai pawhin an hlawh hi a pang­ngaiin an la tho a, tlawmngai pawl hruaitu zingah pawh sorkar hnathawkte an la awm ve leh zel. Hlawh ngaia la ṭhin tan chuan lockdown hi a hahdam a, veivahna, incheina leh ei leh in thlengin a hek lo a, lockdown kalpui reng hi kawng lehlamah chuan inkhawlna remchang tak a ni thei hial zawk a ni.

Hetihlai hian kan hripui dinhmun en hi chuan sorkar lam tan pawh rorel dan thiam a harsa dawn a, na taka inkhuahkhirhna kalpui a ni chung pawhin a ni telin hripui vei hi an la pung zel a ni. Kar khat chiah han inkhuahkhih leh ila, chumi hnuah chuan hripui dinhmun pawh a ziaawm theih beiseina nen total lockdown hi rawt belh leh a ni a, hei hi chu sumdawngte pawh hian hrethiam thei hram se a lawmawm hle ang.