Assam minister lo zin tur hi

August 5 hian Assam sorkara cabinet minister pahnih chu Aizawlah an rawn zin dawn niin Assam chief minister Himanta Biswa Sarma chuan a sawi. Himanta hian ramriah remna thlentir a duh thu a sawi bakah hmarchhakah remna leh hmasawnna awm se a duh thu a sawi tel bawk a ni.

July 26-ah Vaireng­tea Mizo­ram police duty post hneh chhuhtu Assam police-te chu Vairengte mipuiin huaisen takin an lo dang a, he mi hnua state pahnih police-te inkahnaah Assam lamah mi pasarihin nunna an chân zui a ni. Assam hian Mizoram kawngpui an dang ta a, hemi hnu hian Tripura kal tlanga Mizorama lirthei lut turte pawh an dang zui zel a, hripui lenlaiin kan mamawh damdawi takngial pawh an dang duh a ni.

Assam lama kan state kawng­pui dangtute hi tute nge an nih hriat ni lo mah se kawngpui dan thianfai theitu chu Assam sorkar an ni a, anni tan an state kil khata kawngpui dangtute thil tih tihtawpsak hi a harsa lo ang. Mizoram official ṭhenkhat chuan Assam-a kawngpui dangtu hi Assam sorkar ang hialin an puh nghe nghe a, sorkar tih a nih êm loh pawhin sorkar hian he kawngpui dan hi chu a hre ngei a, a titawp duh lo mek a ni.

Hetiang boruakah hian Assam minister pahnih an rawn zin dawn a, an thu ken hriat hmaa lo do emaw, lungawi lohna lo lantir emaw a ṭul ber lo mai thei a; nimahsela Assam-in kan hrawkah min rek reng a, kan thih hial pawh pawi ti lo ang maiin kan kawngpui pawimawh an dang tlat a, chuti chunga Aizawl an lo lut a nih chuan intham lohna lam pawh a kawk thei ang. Assam minister rawn zin turte hian an rawn zin hma ngeiin kawngpui dan hi tihtawptir se, kawngpui dang reng chunga remna siamtua ṭan tuma lan hi chu thil inhmeh lo tak a ni ang.

Mizoram sorkar thuneitute'n sorkar laipuiah an thlen chamchi tawh a, Chief Secretary-in Union Home Minister hnenah kan ram dinhmun leh Assam-in kawngpui an dan luih tlat dante a thlen a, Home Secretary-in a thlen tawh bawk. Minister pawhin tun hnaiah Assam-a Mizoram damdawi tâng chungchang leh Assam police-te'n bungraw thawn lo tura transporter-te an vau hial thu pawh Union Home Minister hnenah lehkha a thawn leh a. Assam hian Mizo khualzinte chet sual theihna tur remchang dap chawpin Assam paltlang tur Mizoram lirtheite endikna tur thupekte hial an lo chhuah tawh bawk a ni.

Hetiang dinhmuna kan din chhan hi Assam-in kan kawngpui an dan luih tlat vang a ni a, chumi chingfel theitu chu Assam sorkar an ni a, chu sorkara cabinet minister pahnih chu Aizawlah an rawn zin dawn. Keini lamin engtin nge kan lo dawnsawn ang a, eng thu nge an rawn ken dawn a la hriat loh; an minister-te hian kan ram min dang bet reng chunga remna an rawn zawng emaw, inṭhian ṭhatna lam an rawn sawi a nih chuan kan sorkar pawhin thu delhkilh neiin, 'Kawngpui hi hawng phawt ula...' ti chungin lo dawr rawh se.