Sorkarin ruahmanna nei se

Mizoram Business Co-ordination Committee (MBCC) chuan tun hnai khan Chief Secretary hmuin an harsatnate an thlen a; sumdawng dawrkai, lirtheia eizawng, industry neitute leh automobile hmanga eizawngte harsatna chu Chief Secretary chuan a hriatthiampui thu sawiin tuna total lockdown bak hi chu kalpui a ngaih tawh loh a beisei thu a lo hrilh a, sumdawngte chu an bungrua inseng­hawina tur hun a siamsak bawk.

Tuna a lan dan chuan Mizoram sorkarin ni 100 chuang inkhuahkhirhna a kalpui hnuah total lockdown hi chu a puang chhunzawm tawh dawn lo a nih hmel. Hei hi mi tam tak tan thu lawmawm a ni dawn a, eizawnna kawnga harsatna lian tak tawk an awm thluah tawh avangin heng mite hian hna an thawk ṭan leh thei dawn niin a lang. Hna chhunzawm theih hi thil lawmawm ni mah se, hripui len hmaa an sum lakluh ang la leh thei tura ngaiawh tur chuan hun a la duh deuh ang tih a rin theih.

Hetihlai hian inkhuahkhirhna zawng zawng hi vawi leh khata thlahdul nghal vek chi a ni hauh lo ang a, tuten emaw an nawr apianga nghing mai loin sorkar pawhin din nghehna chin a neih ngam a ṭul hle. Eizawnna kaihhnawih bik loh theih loh thil hi an phalsak a nih pawhin chumi piah lama intawlenna ang chi chu an khap thiam a pawimawh dawn a, Covid-19-a kan dinhmun chhiatlai ber a ni tih hre chungin fing taka ro a rel a ngai dawn a ni.

Tunlai hi Covid-19 positive kan ngah lai tak a ni a, a damlo na zual enkawlna damdawi-in khumte chu a khat reng a, kan do ber hripui hian min man natlai ber a ni hial ang. Chutih rualin total lockdown kalpui reng hi mipuiin an tawrh avangin sorkar tan pawh thil tih chi a nih hmel tawh si lo a, mithiamte rawnin ruahmanna fel tak siam thuai se a ṭha ang.

Sorkar hian mipui hi an awm dan tur hriattir hma deuh ṭhin se, a tûka awm dan tur a hma zana inkaihhruaina chhuah chauh maite hi a tlai lulai lutuk ṭhin a; total lockdown hman mek tawp huna a kal zel dan tur hi sorkar hian a rang lamin chhuah thuai thei se a lawmawm ang.