High Court thutlukna Sorkar mualphona

RT-PCR for Chhimbial-in Lungleia RT-PCR laboratory din tura sorkar an khinnaah Gauhati High Court chuan thutlukna a siam ta a, laboratory din tura hma la nghal turin Mizoram sorkar a hriattir. Mizoram sorkarin chhim lam district-te'n RT-PCR laboratory an mamawh lo tia an tarlan tawh chu Court hian a pawm lo a, laboratory bakah Covid-19 veite enkawlna damdawi-in din thuai turin a hriattir bawk a ni.

Mizoram sorkar hi Covid-19 dona kawng tam takah faktlak khawpin a thawk ṭha a, mipuiin an ṭawiawm ṭha bawk nen state dangte aia chet ṭhatna a nei nual a; nimahsela Lungleia RT-PCR laboratory din chungchangah hi chuan a ṭan dan a fuh lo laklawh a ni ber mai. Congress MLA pakhatin chhim lama hman tura RT-PCR a pek kha lawm taka a dawn hnuah laboratory a din duh lawk lo a, a din duh lo mai ni loin chhim lam district-in RT-PCR laboratory an mamawh loh thu Mizoram sorkar hian a sawi hial a, hei hi mipui tan a na hle ang.

Hripui do turin mipui nen theihtawp kan chhuah tlang a, political party pawh ṭang rual turin sorkarin a ngen a, chutihlaiin eptu MLA thilpek a dawn dan leh a kalpui dan en hi chuan kan sorkar hian tih fuh tawk loh a nei tih a chiang viau. Lungleia laboratory din a theih leh theih loh endik tura Mizorama he lam kawnga mithiam ber ber sorkarin a tirh ngeite pawh rintlak lo ang dawn dawnin an chhuah duh a, an thil tih duh loh tawp tilui tura nawrna ang chi reng reng chu na takin an chhâng lêt (counter) a ni ta ber mai.

Hei vang hian mi ṭhahnemngai intelkhawmin pawl hial an din hnuah High Court lamah PIL an thehlut a, an aiawha ding tur ukil-te mahni inpein a thlawnin an ding leh zel a, a tawpa Court thutluknaah Mizoram sorkar ṭan hmun chu pheh thluk a ni zui ta a, hei hi chu sorkar tan mualphona lian tak a ni. Heti taka kal thui kher ngai lo hian Mizoram sorkar hian hma la nghal se fak a hlawh zui tur a ni a. India ram state zinga RT-PCR laboratory nei tlem ber kan ni reng chung leh hripui vei kan pun belh zel chunga laboratory mamawh lo anga an ṭang tlat duh hi chhim bial mipuite tan hriatthiam a har hle ang.

Chhim lama RT-PCR labo­ratory din tur chungchang hi mipui mamawhna zawn leh mipuite hmangaihna aṭanga thlir lo a, politics tarmit aṭanga thlir a nih vangin a kal fuh lo laklawh a ang ber a, Mizoram sorkar tana thil tih harsa ni si lo an tih duh lawk loh avangin a tawpah an mualpho phah ta a tih theih hial awm e.