Social media leh ram hruaitute

Congress party leh ZPM Ṭhalai chuan minister Robert Romawia Royte chu Twitter-a Assam chief minister Himanta Biswa Sarma tlawn zawnga thil a post vangin an dem a, hnam mualphonaah an ngaih thu an sawi. Hetihlai hian MNF party chuan, "Kan Minister-in Twitter hmanga a hmalakna hrang hangte hian a huaisenzia leh Assam CM a ngamzia a tilang chiang hle zawk a, kan chhuang hle," an ti.

He thil thleng hian politics-a kan ngaihdan inpersan­zia chiang takin a tilang a, eptu lamin hnam hralhtu leh zahpuiawm hialah an ngai a, roreltu lam erawh chuan an Minister chet dan chu chhuanawm an tih thu an tarlang thung. Political party mi leh sa ni ve lo tan chuan a khawi zawk hi nge dik a, a khawi hi nge dik lo tih pawh hriat harsa khawpin thil a kal ta a, ramri vanga Assam nen kan buai meklaia Mizoram chhunga kan ngaihdan a inṭhen phawk mai hi a zialo hle a ni.

Assam Chief Minister hi hman ni lawka kan ṭhalai rualte'n Twitter hmanga an dem rawn leh an do rawn kha a ni a; a chet dan zahpuiawm an tih thu te, dawt sawi hmang a nih thu te, buaina bul ṭantu a nih thute leh an police-te thihnaa mawhphurtu ber a nih thu Mizo ṭhalai sang rualin Twitter hmangin khawvel an lo hriattir zo chiah a ni. Chu pa, Mizo ṭhalaiten an dem rawn Himanta chu lo biak ṭhat emaw, a lam ṭanga lo ṭan tum emaw a la hun lo mai thei a; kan hotuten remna an zawng duh a nih pawhin Mizo ṭhalaite'n an dem rawn luai luaina Twitter hmang thoa tuna lo kawm nêl hi a la hun loah a ngaih theih.

Khawvel a inthlak zel a, ram dang leh state dangte ang bawkin tunah chuan social media lamah kan ram hruaitute'n thu leh hla an nei ta fo a, thu pawimawh tak tak puan chhuahna atan pawh an hmang. Tualchhunga media lamte bula press meet pawh nei ngai mang lote'n an duh puan chhuahna atan social media an hmang uar chho ta tawlh tawlh a, hei hi khawvel kalphung inthlak chho zelin a ken tel a ni.

Hetihlai hian kan ram hruai­tute hi social media hman danah hian fimkhur se, ṭhalai hip tum luata minister zawng zawng deuhthawin Twitter-a thu leh hla an nei ta sup sup te, a chhuah âwm leh âwm lo pawh thliar hrang mang loa kan Chief Minister Twitter leh Instagram-te hial an hmang zalen ta lutuk deuhte pawh hi fimkhur a ṭha a; social media hmang fimkhur tura ram mipuite an chah ṭhin ang bawkin ram hruaitute pawh hi social media hman kawngah an fimkhur a ṭul takzet a ni.