AAP kan el tur hi a lawmawm

MNF treasurer chuan Delhi-a Arvind Kejriwal-a party Aam Aadmi Party (AAP) tih theih chu MNF-in a tih ve theih thu leh, chu aia ṭha zawk pawh a tih theih thu a sawi. MNF treasurer chuan AAP chu an term hmasa chhungin tui, electric supply leh thil dangte chu ti ṭhain zirna phei chu a thlak danglam dawrh nia sawiin, "Chutiang bawkin MNF sorkar inṭan tir hi kawng, gas, electric leh thil hrang hrangah nasa takin hma la chhoin a thawk ṭha hle. Education system hi tih ṭhat zel kan tum a, kan Chief Minister leh Education Minister hruaina hnuaiah nasa takin hma kan sawn chho mek zel a, hma kan sawn belh zel dawn," a ti a, AAP-in a tih theih chu MNF-in a ti thei a, AAP tih theih aia ṭha pawh MNF-in a tih theih thu a sawi. 

India ram khawpui enkawltu political party AAP chuan tihtakzeta hna thawkin danglamna lian tak an thlentir thei a, term khat chhungin Delhi-ah thil thar tam tak an thlentir. Zirna lamah mite mak tih khawpin sorkar sikulten hma an sawn a, hriselna kawnga hmasawnna hmuh tur a awm bakah mi rethei zawkte tán tui bill leh electric bill nasa takin an tihhniamsak a, sorkar lirtheia veivah man a hniam mai ni loin hmeichhe tana a thlawhna veivah theihin an siam a, India ram hmun danga la thleng ngai lo leh tih theih loh ang hiala ngaih an thlentir thei a ni. 

Mizorama ruling party lamin, "Kan ti ve thei lo ang, keini tán chuan a harsa ang," ti mai lo a, "AAP tih theih chu kan ti ve thei," tihah pawh duhtawk mai lo a, AAP aia ṭhaa hnathawh an tum ngam hi an fakawm hle. 

Mi ṭhenkhat chuan hei hi fiamthu ang lek lek zawngin tiel deuh takin social media lamahte an sawi zawm a; nimahsela kan ramah hian hna kan thawh duh tak tak a, party mi leh sâ invulhna kan paih a, dik leh rinawma kan awm chuan AAP aia hna ropui zawk pawh thawh theih a ni. Mipui nuai 11 vawt vêl enkawlna tur chuan kan sum leh pai neih pawh a tlem chhe lo a, enkawltu mipui an tam lo bawk a, AAP aia ṭhaa hnathawh hi thil theih a ni. 

Zawhna inzawh ngai erawh chu, "AAP angin MNF hi an rinawm ve thei ang em? AAP angin MNF an dik ngam ang em? AAP angin MNF hian kawng hmang an hria em?" tih hi a nih zawk hmel.