Ramri thila inpumkhatna vawn nun ni se

July 26 khan Mizoram chhung, Vairengte daia Mizoram police duty post siam chu Assam police-in an IGP hoin an rawn hneh chhuh a, hei hi hriain Vairengte mipui thinurin Assam police-te hi an bei zui. Hemi kal zela buaina chhuakah Assam police lamin silai an hmet puak hmasa a, Mizoram police-in chhang letin an duty post hi an la kir leh thei ta a ni.

Ramria buaina chhuak hi Assam-a political party leh Mizorama political party-te inkar a ni lo a, state pahnih police-te buaina a ni. Mizo mipuiin ram chhanin silai pawh nei lo chungin ram chhanin silai keng an hmachhawn a, chu chu state leh state buaina a ni. He buainaah hian Mizo mipui kan inlungrual a, kan zavaiin kan ram humhim kan duh a, buaina kaihhnawihah pawh Mizo mipuite ngaihdan a thuhmun ṭha hle a ni.

Hetihlai hian tun hnaiah political party mi leh sate zingah, 'Kan hunlai chuan,' tih leh, 'In hunlai chuan,' tia inchirh thehna lam hawi leh mahni party che ṭha zawka inchhalna lam hmuh tur a tam ṭan ta hle a, hei hi hmeh mih vat loh chuan hnam inlungrualna tichhe thei thil a ni.

Tunah hian kan inchuh ber chu 'ram' a ni a, a ruh langa sawi chuan buaina chhuah hma ai khan ram hi kan la lak belh lo a, Assam police-in kan police-te duty post an chhuhsak chu Vairengte mi­puiin huaisen taka an beih let hnuah kan police-te'n huaisen tak bawkin an bei a, kan lalet leh mai zawk a ni.

Tuna kan thlen chin hi tute party mahin midang demna atan la hmang lo se, mahni infakna atan pawh hmang lo se, Mizo mipuite ṭanrualna tichhe thei zawnga ṭawngkam cheh party worker zinga an lo awm palh a nih pawhin khak ngam turin political party tinte infuih zawk se; ramri buaina hi political party thil a ni lo a, ram leh hnam thil a ni zawk e.