Lailapur inbumna?

August 7, 20201 khan ramri buai avanga Mizoram lirthei Silchar-a tangkhangte chu Assam police-te ruahman angin an venhimna hnuaiah hruai chhuah an ni. Kawng lakah dingin khua an nghak thim a, thim hlima Lailapur an thleng chu Assam police-te awmlai ngeiin an lirthei chu mipuiin an khawih a, driver zingah hliam tenau tawk an awm.

Mizoram House, Silchar aṭanga lir­theite an kal chhuah hma hian Assam lamin police tirin Mizoram sorkar DRC hnenah venhimna an pek theih thu chiang takin an va hrilh a, DRC hian fimkhur takin Cachar SP be pawpin a finfiah leh thlap a, hemi hnu hian lirtheite hi kal ṭantir an ni. Lailapur pana kala Mizorama haw tur na na na Silchar pelh tawh hnuah Sonabarighata-ah dintir an ni a, an din chhan hi hriat a ni lo. Thim hnua Lailapur an thleng leh mipuiin an beih zui dan en hian, he thil hi ruahmanna fel tak hnuaia thleng a ang hle.

Lailapur lama buaina a thlen hnu hian Assam minister chuan kawng dan pin chu an hawng tawh tiin zan dar 9 velah Mizoram pan tur lirthei tangte a vai liam leh hnuhnawh a, hei pawh hi ruahman sa vek a ang hle. He mi ni vek hian Mizoram lam media mite chuan Lailapur leh a chhehvel hi an tlawh a, lirthei hi a hranpaa dan an ni lo a, kawngpui pawh a tlang vek a; nimahsela lirtheite hi tlan lo tura hrilh an ni a, a hrilhtu chu Assam police lam niin a lang - heng thil thlen dan zawng zawng en hian, Mizoram luhka kawngpui hi Assam sorkar ruahmanna anga dan pin ngei niin a puh theih.

Shillong-a Union Home Minister hoa hmar chhak Chief Minister-te inbiak hnu lawkah IGP hoin police 200 rualin Mizoram police duty post an rawn hneh chhuh tawh a, Aizawla Assam leh Mizoram Minister-te meuh an inbiak hnu lawkah Lailapur-ah hetiang thil hi a thleng leh ta. Assam-a sorkarna vawnfung chelhtute hi BJP (NDA) an ni a, Mizoramah NDA hnuaia mi tho MNF-in ro an rel a, chumi piah lamah NEDA tih hnuaiah an la thawk dun zui a ni.

Heti tak maia mahni thawh­puite laka rinawm lo Assam sorkar hi biak nawn fo emaw, ṭhian ṭhaa siam tum emaw, thurualpui emaw hi thil harsa tak a ni tawh ang. Engpawhnise Lailapur inbumna ang hi thleng nawn tawh lo se, kan mite nunna atana hlauhawm khawpa bum chhuah an ni hi a demawm takzet a ni.