Aitlanga huan neitute manganna

Vairengte ram chhung Aitlanga Assam-in an ram an chhuhsak tak chhungkaw 18-te chuan tun hnai khan Mizoram Chief Minister hmuin an harsatna an thlen a, an ram neih lêt lehna kawnga pui turin an ngen.

Aitlangah hian June 29, 2021 khan Assam police ṭhahnem tak kalin chhungkaw 18-in eizawnna atana an hman ber an huan chu hneh chhuhin police camp an siam chilh a, Mizote hi an hnawt chhuak a ni. Aitlang ram neitute hian heng ramte hi kum 50 chuang an lo enkawl tawh niin an sawi a, a zau zawng pawh ṭin 80 leh a chanve vel niin, kum tin Rs. 2,000,000/- chuang man thlai an thar chhuak ṭhin a ni.

Vairengte daiah national highway kianga kan police duty post ngei pawh hneh chhuh tumtu Assam Police-te hian Mizoram lam inrin loh hlanin heng ramte hi an lo laksak tawh a ni. Mizoram police-te pawh mualpho angreng takin Aitlangah hian a dawih zawk ang maiin an lo lang tawh a nih kha. He mi hnu hian Mizoram lam inrin loh hlan bawkin kan luhka kawngpui pawimawh ber kama Mizoram police duty post pawh hneh chhuh an tum leh a, hei hi chu Vairengte mipuiin hriain na takin an bei lêt a, Assam lamin silai an hmeh puah hnuah Mizoram police lamin silai hmet puak vein Assam police hian an tum angin duty post pawh an la thei ta lo.

Assam hian police tha chakna hmangin Aitlang erawh an la hman a, hei hi kan ram hruaitute hian kan neih lêt leh ngei theihna turin hma an lak a ṭul khawp mai.

Silai hmanga inbeih a hun tawh lo ang a, ṭha taka sawifel tumin ṭan la zui se. Chhungkaw 18-te eizawnna chhuhsaka an awm piah lamah kan ram ngei min hneh chhuh avangin kan neih let leh ngei a ṭul a ni.

Ramri inchuhna hrulah kawngpui dan a ni a, kawngpui a tlang tak avang hian kan buaina hi a fel ta a ni lo a, a la buai nasa hle tih Aitlanga thil awm danah enin a chiang a, Mizoram sorkar hian heng ramte hi la kir turin ṭan la rawh se.