Airport mawi ber

Lengpui Airport-a IndiGo thlawhna service thar lawmnaa khuallian Mizoram chief minister Zoramthanga chuan airport mawi ber siam an tum thu a sawi a, "Airport lian ber chu kan siam thei lo ang a, airport mawi ber leh cute ber siam kan tum," a ti a, Lengpui aṭangin India ram khawpui direct flight a la awm a beisei thu a sawi. 

Mizoramin airport kan neih chhun hi a lûn ve ta hle mai a, state pawn leh ram pawn khualzin an lo luh belh zel piah lamah Mizoram mipui ngei pawh kan veivak ngun ve ta viau mai. State dang leh ram dang airport-te nena khaikhin ralah pawh kan airport neih chhun hi a la sitawm hle a, a len leh têt thu lam aiin a bâlin a ṭawp a, khaw lumna hmuna awm a ni chungin boruak vawn daihna a awm ṭha tawk lo a, inthiarnate pawh siam ṭhat ni ve bawk mah se duhthu a la sam lo hle. 

Chief minister sawi ang hian airport lian ṭha tak chu kan siam thei hauh dawn lo a, kan ram leilungin a zir lo a; nimahsela kan neih chhun tihfai, vawn fel leh vawn thianghlim hi chu thil theih a ni ngei ang. Airport hung chhunga runway pawn si lai te hi a hnim thei takzet a, a hungna a hlui tawh bakah hmuh hrehawm khawpte a awm tawh bawk a, kualzinte ṭhutna, inthiarna leh thil dangte pawh siam ṭhat ngai a tam ta khawp mai. 

Chief minister-in hei hi veia 'airport mawi ber leh cute ber' siam duhna rilru a pu hi a lawmawm a, kan airport neih sa hian tihlen lam aiin chei ṭhat a, vawn fai a, enkawl uluk a mamawh a ni.