A khaw mila thlai thlan bik neih

Samthang khua, Champhai district chuan kuminah fur zikhlum quintal 1,100 hralh tawhin hei hi Rs 26,40,000 man a ni a, kumin chhungin quintal 4,000 thar chhuah an inbeisei a ni.

Mizoramah hian khaw hrang hranga kan thlai chin hi a inang deuh vek mai a, khaw chhak kil tawp leh khaw thlang kil tawpah pawh kan thar chhuah hi a danglam tam lo. A sik leh sa, ruah tui tam dan leh a hmun hniam leh san lam kan ngaihtuah vak lo a, Mizo chawhmeh duh ang chi hi mahni loa kan chin theih zat ang kan ching tawp a ni deuh ber mai. Tun hma kha chuan hralh suma chantir lam kan ngaihtuah vak lo a, tunah erawh sum chang thlai lam kan uar chho mek.

Kan ramah mithiam ṭha­hnem tak an awm tawh a, anni kaihhruaina hnuaiah hian kan thlai thar hmelhmangte pawh a danglam chho zel a tih theih ang. Hetihlai hian a nawlpui hi chuan mahni ei khawp ngawr ngawr hi kan thar a, furlaiin kan ei sen loh thlai kan thar chang a tam a, a hralhna a mumal loh avangin kuthnathawktute'n sum an thawk chhuak hleithei lo a, hei hian an retheihna a belhchhah a ni.

Tun hnaiah khaw ṭhenkhatah anmah­ni remhriatna leh sorkar puihnaa thlai thlan bik a hlawma ching an awm ṭan a, an hlawh­tlinpui hle tih a takin kan hmu. Hri leng avangin thlai hralhna (vegetable supply chain) lamte sorkarin a han ruahman a, chu chu a takin a ṭangkai hle tih kan hmu chho zel.

Hripui leng te, kan ramri buaite hi inzirna remchang­ah hmang ila, Mizo­ram­ah hian mahni khaw milin thlai chin uar bik nei ila, a hlawma hralh chhuah tham law law thar tum ila, state pawn aṭanga thlai lalut lo hian kan awm thei thuai ang.