Lockdown thlah dul leh sorkar

Mizoram sorkar chuan hun rei tak chhung Aizawl khawpuia total lockdown a kalpui hnuah partial lockdown a puang a, rei tak khaihlak tawh eizawnna ṭhenkhat pawh an kalpui leh ṭan ta a ni.

Ni 100 chuang zet inkhuah­khirh dan hrang hranga inkhuahkhirh a nih hnuah Aizawl khawpuia total lockdown chu thlah­dul a ni leh ta a, mi tam takin eizawnna chhunzawm hlan an nghakhlel a, mi tam takin a la hun loin an ngai thung.

Eizawnan pawh chhunzawm thei loa rei tak awm tawh, sum lakluh nei miah lote tan chuan lockdown hun chhung a reiin sum leh paiah nasa takin harsatna an tawk hman a, chutihlaiin sum lakluh tlahniam ve lem lo thla bia hlawh la tan lockdown-in an sum bawm a khawih che lem lo.

Tunah chuan sorkar lam sawi danah hri a len tawh loh vang ni loin, eizawnna kalpui a ṭul tawh avangin loh theih lohin partial lockdown puan a ni a, mitin an fimkhur a ṭul takzet.

Hetih hunah tak hian sorkar hi a hma aiin khauh lehzual thei se, hripui len leia nungchang tura duan Covid Appropriate Behaviour (CAB) zawm lote veng tur leh, dan bawhchhiate mana hrem turin duty ṭhahnem zawk insiam hun tak a ni.

Local Level Task Force awm lo phei se tunah hian sorkar mi leh sa duty hi an ṭhahnem lo em em a, mipui hi chu englai pawha ven ngai an nih avangin a vengtu lam inruat hnem hi hri dona atan a sawt ngei ang. 'Total lockdown thlahdul an duh alawm,' tia titau rilru pu angrenga ralthlir mai palh a awm thei a, hei hi chu sorkar kalphung tur a ni lo a; a mipuite himna turin sorkarin partial lockdown kalpui chhung hian a hma aia tam zawk vengtu leh viltu (police leh executive duty) dah se, hripui venna kawngah a sawt ngei ang.