Thisen pekah i ṭang thar ang u

Covid-19 hri leng leh total lockdown avangin Mizoramah a thlawna thisen pek a tlahniam nasa a, blood bank hrang hrangah mamawh zat thisen a awm meuh lo. Association for Voluntary Blood Donor (AVBD) hruaitute sawi danin ṭhalaiin Covid vaccine an lak nasat avangin thisen pek a tlahniam a, zirnain khar a nih avangin a hlawma thisen pe ṭhin college hrang hrangin thisen pek runpui an buatsaih thei lo a, inkharkhip avangin thisen pe an tlem bawk a ni.

Covid-19 hri a leng mek chung chuan natna dang hi a bo ta a ni lo; Covid vanga damlote bakah natna dang vangin damdawi-inah thisen mamawh damlo an awm reng tho a ni. Heng damlo zingah hian khawpuia cheng, ṭhenrual ngah deuhte tan chuan thisen petu zawn hmuh hi thil harsa tak a ni lo mai thei a; nimahsela thingtlang mi harsa zawkte tan chuan rulh leh tura thisen pûk pawh thil harsa a ni ang.

A thlawna thisen pek kawng­ah Mizo ṭhalaite kan harh a, thisen pek kan intihhmuhin a pek pawh kan pe ṭha thawkhat viau ṭhin; nimahsela hripui leng avanga kan thil tih ṭhin kan chawlhsan tam tak zinga thisen pek runpui huaihawt (blood donation camp) pawh a tel. Blood bank lam thawktute chuan lockdown hnuaiah pawh thisen hi chu an la theiin an dawng thei reng tih an sawi a, kan taksa lamah harsatna kan nei a nih loh chuan thisen pe tura kan harh thar leh a hun ta khawp mai.

Ram leh hnam hmangaih turin kan inzirtir a, tun hnaiah boruak hrang hrang avangin ram leh hnam hmangaihna pawh kan nei thar nasa niin lang a, thisen pek hi ram leh hnam hmangaihna kawng khat a ni tih hre chungin he lam zawng hian kan hnampuite kan hmangaihna hi lan chhuahtir tam thei ila a lawmawm ngawt ang.

Damlo mangangte dinhmun ngaihtuah hian a thisen pe theitu zawka kan la ṭang hi thil lawmawm a ni a, midangte ṭanpui hi a Mizo em em a, a Kristian bawk a ni.