Ngaihven hlawh Lengpui Airport

Chief Minister Zoramthanga chuan tun hnai khan Lengpui Airport tlawhin, tihchangtlun hna kal mek a enfiah a, thawktute nen an thlen chin leh hmalak zel dan tur an sawiho. Tun dinhmunah terminal building chhung siamṭhat te, a pawna elevated road leh parking area siam belh te, CRPF te awmna hmun tur siamṭhat hnate thawh mek a ni.

Sum ṭhahnem tham tak hmangin Lengpui Airport hi chei ṭhat mek a ni a, a pawimawh em avang pawh a ni ang a, kan ram hotu lu ber pawhin vawi tam tak a tlawh ta. Airport ṭha neih pawimawhzia hi a takin kan hre chho zel a, hripui lenlai leh ramri buai avanga inkal pawh a harsat lai pawhin airport aṭangin awlsam takin kan mamawhte kan lalutin ṭul bik thilah pawh kan zin reng thei a ni.

Nikum April-ah khan chief minister leh Aviation Committee-in chipchiar takin airport hi an lo enfiah tawh a; August-a kan chief minister-in a tlawh khan isolation parking bay siam ṭhat hna, thlawhtheihna dinna hmun Apron tihzau te, Air Traffic Control siamṭhat mek leh runway tawpa safety area siamṭhat turte leh pangpar leh thingkung hmanga airport an chei mek a enfiah tawh. November-ah khan airport hungna fencing te, lirthei parking area te, terminal building pawna chawlhna hmun te, airport apron extension hna thawh mek te, isolation parking bay, baggage make-up area leh runway zula parallel drainage an siamte chu chief minister hian a enfiah leh bawk.

Kan airport neih chhun hian kawng tam takah tih­hmasawn a mamawh a, a termi­nal building pawh chei ṭhat a ngai a, state danga airport-te nena khaikhin ralah phei chuan duhthu a la sam lo hle. Hei vang pawh hi a ni ang, kan CM meuh pawhin vawi hnih-thum mai ni lo deuh a tlawh ta a, chuvangin hnathawktu lam pawhin kan state hotupa berin a ngaih pawimawh hi chu ṭha leh chak taka an thawh i beisei ang.

Lengpui Airport tluka hna an thawh laia state pakhat chief minister-in a vil ṭhat hna dang hi a awm lo hial mai thei. A siamṭhatna tura sum hmuh a lo ṭhahnem bawk nen, siam zawh hlan a nghahhlelhawm a, Mizoram mipuite'n airport changtlung zawk kan nei thuai dawn tih a lang chho zel e.