Chhawmdawlna atan Sorkarin sum a hmang em?

Mizoram Pradesh Congress Committee Media department chuan Mizoram chu khawvela lockdown puang rei ber an nih thu an sawi a, chumi avanga chhawmdawl ngaite chhawmdawlna atan sorkar pawisa an hmang duh miah lo tiin, sorkar aṭanga chhawm­dawlna pek chhuah chu Chief Minister Relief Fund aṭang vekin a ni a, sorkar sum an la hmang lo niin an sawi.

Covid-19 in kan hriselna a tibuai a, mi vanduaite nunna hial a la a, chumi piah lamah chuan chhungkaw tam tak retheihna a belhchhah a ni. Mizoramah chuan lockdown kalpui chhung a rei bik avangin khawpuiah hnathawk thei lo chhungkua an tam hle a, nikum lockdown puan tirh lama ṭanpuina sum dawng hreh ngawih ngawihte pawhin kumin lockdown puan rei hnuah chuan ṭanpuina pawisa an dil lo chauh a ni ta. Khawpuia retheite retheihna a zual a, hripui lengin miretheite na takin a bei a ni ber mai.

Retheite tan miṭhahnem­ngaite an luangchhuak nasa a, mahni in leh dawr luahtute a man âwlte leh a man hniam zawka la ṭhahnem tak an awm a, sum leh pai bakah ei turte sema mahni insengso mi ṭhahnem tak an awm. Ṭhianho leh pawl anga luangchhuak pawh an ṭhahnem hle. Kohhranin a tih tur tiin a hmunhmate Covid-19 dona atan a hmantir bakah sum ṭhahnem takin mi harsate an chhawmdawl a, hetihlai hian sorkar sum bawm aṭangin miretheite chhawmdawlhna sum hi pek chhuah ni ve loin a lang a, a zialo hle a ni.

CM Relief Fund hi miretheite chhawmdawlna tura thawh khawm a ni a, Covid-19 avanga harsatna tawk mekte tan a tam zawka hman theih ni se a ṭhat tehlul nen sorkarin sorkar damdawi-in bungraw leina atan tam tham tak a hmang ṭhente hi a zialo hle a, hetiang a nih chuan sorkar sum awm sa (mipui thawh khawm ni lo) aṭang hian miharsate chhawmdawlna hi pe chhuak tel se a inhmeh tur a ni a; nimahsela Mizoram sorkar hian mipui thawh khawm aṭang ni lo ama pawisa neih sa hmangin miretheite a chhawmdawl lo niin a lang.

Engpawhnise CM Relief Fund aṭanga chhawmdawlna pek chhuah pawh hi sorkar kal tlanga pek a ni ve tho tih erawh chiang ila, kan sorkar hian miretheite hi chhawmdawl a duh lo ni loin sum lamah harsatna a tawk pawh a ni thei e. Chuvangin, CM Relief Fund-a sum lut chhun na na nâ hi chu thil danga pawt peng tawh loin chhawmdawlna atan liau liau hman ni tawh rawh se.