Tih loh tawp aiin tlai deuh pawh a ṭha zawk

Health Minister chuan tun hnaiah Mizoramah Covid-19 dinhmun a ṭha hret hret tih a sawi a, hri vei hmuh chhuaha lâk hran zung zung tuma an beihna chuan, "Rah ṭha a chhuah ṭan niin a lang. Tun hnaiah hri kai thar zat a tlakhniam bakah ZMC leh hri kai enkawlna hmun hrang hrang phurrit pawh a zangkhai ta niin a lang," a ti a, inthlahdah erawh a thiang lo tih a sawi tel.

Mizo mipui ṭha­hnemngaiin Mizo­ram sorkar chu hripui vei leh vei lo a hlawma endik (mass test) turin social media hmangte leh kawng hrang hrangin an nawr a; nimahsela sorkar lamin mass test an kalpui hleithei lo. Hri kai endikna tur khawl rintlak, RT-PCR dahna laboratory din belh turin na takin an nawr bawk a, hei pawh hi a tihlawhtling lo. Nimahsela tun hnaiah hripui vei an pun zel avang leh India ramah pawh a dinhmun ṭha lo zinga kan awm tak hnuah loh theih lohna avangin mass test kalpui a ni ta a, RT-PCR khawl bunna tur pawh High Court lam thupek angin buatsaih a ni dawn ta.

Mithiam ni lem lote pawhin an thil chhiar aṭanga an hriat­thiam theih chu hripui vei leh vei lo a hma thei anga dap chhuah a, hri veite lak hrana enkawl dam zung zung hi Covid-19 do dan leh buaipui dan ṭha a ni a; amaherawhchu kan sorkarin a inenkawlna lamah harsatna a tawh vang te, a test-na hmanrua leh thil danga harsatna a neih vangte pawh a ni mai thei e, a hlawma test hi a kalpui thei lawk lo.

Hei vang pawh ni a ni mai thei, India ram state dangte aia rei lockdown puan a ni a, hun rei tak tak lockdown puang ve lem lote an ziaawm hnuah pawh kan buai rei hle a ni.

Rei tak total lock­down puan hnu pawha hri vei pung zel kha tun hnaiah chuan kan dinhmun a ziaawm ve ṭan dawn ta niin a lang ta a, a lawmawm hle.

State dangin mass testing an kalpui te, laboratory an buatsaih belhte hi a tirah ti ve lem lo mah ila, Sap thufingin, 'Better late than never,' a tih angin tih loh hlen ai chuan tlai deuh tawh pawha tih ve leh hnuhnawh hian rah ṭha a la chhuah zel a ni.