Hri dona atana khawtlang hnathawh hi State dang hmaa chhuan tham a tling

Tun hnaia Union Health Minister hoa India hmar chhak state-a Health Minister-te'n Review meeting on Covid-19 Pandemic and Immunization in NE States an neihah Mizoram Health Minister chuan hripui dona kawnga khawtlang hnathawh hrang hrangte a sawi chhuak.

Sorkar thuchhuah tarlan danin Health Minister hian sorkar laipuiin hripui dona atana a ruahman DCH, DCHC leh CCC bakah khawtlangin CCCC an siam chu hri kaite enkawl zuina atan a ṭangkai thu a sawi a, CCC hi sorkar tel loin IMA leh local volunteer-te'n an enkawl thu a sawi chhuak. Hei bakah hian state, district leh village level-ah task force din a nih thu te, hripui lenlaia a thlawna thingtlang lamin khawpui tana ei tur an pek thute a sawi a; vaccine lak leh pek kawngah task force, NGO leh kohhrante hnathawh a ṭangkaizia a sawi bawk.

Sorkarin theihtawp a chhuah a, chumi piah lamah state dang neih ve loh a thlawna inpe khawtlang tana ṭhahnemngai tak takte kan nei a, chuti chung chuan Mizoram hi tun dinhmunah hripui vei awm tamna state kan la ni mek a, a vanduaithlak hle.

Kan sorkar tha chakna te, a mihring (man power) a neih angte leh a sum leh pai hman theih/ phal zat ang lek nen inenkawl phei ila kan dinhmun hi a chhe hle dawn tih a chiang a; hun rei tak chhung chu sorkar enkawlna aiin khawtlang din leh enkawl CCCC-ah damlo an tam zawk a, hengte avanga sorkarin a sum senna tura pawisa a hum chin pawh a tam hle a ni.

Hri do kawnga khawtlang hna­thawh ropuizia hi state dangte hnena puanzar tham leh uanpui tham a ni takzet a, hetiang taka ṭang rual state hi hmun dangah an awm ve kher lo ang. Hetihlai hian mipuiin an sum, tha leh hun senga hripui an dopui chung pawha hripui leng a ziaawm hleithei lo hi sorkar dem mai pawh a awl rum rum dawn a, indem leh insawisel hun a nih loh avangin ṭhahnemngai takin i thawk tlang zel ang u.