Sum awm loh chhuanlama hman A remchang dawn ta lo?

Sorkar laipui chuan Covid-19 Emergency Response and Health System Preparedness package (ECRP) Phase II hnuaiah Mizoram sorkar chu cheng vaibelchhe 44.43 a pe dawn a; hei hi Covid-19 swab test tihna tur ruhrel dinna atan te, damdawi dahṭhatna tur siamna, hripui vei enkawlna tur khum siamna, ventilator leh oxygen man atante leh hripui dona kaihhnawih thil dang atana hman tur a ni.

Annual financial statement aṭanga a lan danin Health department-ah hian tun sorkar kum chhungin cheng nuai 62,373.62 dah a ni a, hei hi Covid-19 hripui a len tawh hnua budget pharh a ni.

Thil mak deuh mai chu sorkar kum liam ta 2020-21 khan Health department-ah hian hripui a leng dawn tih hre lawk miah loin cheng nuai 62,632.39 dah a ni a, hripui a len hnuah hian Health department-ah hian pawisa dah belha hnekin an dah tlem ta thung a ni.

Sorkarin tun hnaia sum awm loh chhuanlama a hman tlanglawn ber chu 'Covid-19 hri len vang' tih a ni ber a, tunah erawh sorkar laipui aṭangin Covid-19 dona turin cheng nuai 4,443 min rawn pe ta a, hei hi chu state sorkar tan ṭhatpuina tham a tling hial ang. A chhan chu Health department-a sum awm sa cheng nuai 62,373.62-a a tam zawk hi chu sorkar hnathawkte hlawh leh sorkar pisa inenkawlnaa kal ral tur a ni a, hriselna tura hnathawhna tak taka sum dah hi a tlem tham hle.

Tuna cheng nuai 4,443 kan dawn belh tur hi chu sorkar hnathawkte hlawha kal ral tur a awm tawh lo a, hripui dona tur liau liaua lo kal a nih tawh avangin a lawmawm zual a, heng pawisate hi thiam tak leh dik taka hman a nih chuan mipui nuai 11 vela hripui vei chhunte enkawlna tur atan chuan kori a tu tham hle ang tih a rin theih.

Sorkar hian hma­sawnna hna­thawh ṭhulh chhanah te, mipuia an intiam thil an tih lohahte hripui leng hi chhuan­lamah a lo hman tawh ṭhin a nih pawhin, a demawm hran lo a, hripui leng avangin sorkar sum a hek hle a ni.

Chutihlaiin kohhran leh tlawmngai pawlte thahrui leh sum leh pai hmangin hripui vei tam zawk enkawl an ni a, IMA lamin hlawh phût loin CCCC-te hi an vil zui bawk a ni. Chief Minister's Relief Fund lamah cheng vaibelchhe 30 chuang mipuiin an thawh khawm tawh a, tunah sorkar laipuiin hripui dona atan bik liau liau cheng nuai 4,443 min pek belh leh dawn bawk avangin Covid-19 hi sum awm loh chhuanlama hman reng a remchang tawh kher lo ang?