Rukru changkang

Mizoram Police chuan thuchhuah siamin, tunlai hian misualte'n internet banking leh smart phone hmanga mi bum dan thar an hmuh chhuah thu tarlangin, mipuite fimkhur turin an chah. 

Khawvelin hma a sawn rualin misualte pawhin an chet dan an thlak chho ve zel a, tun hnaiah cyber crime an tih mai internet leh a kaihhnawih hmanga inbumna lian tham tak tak a thleng mêk a ni. Mipui nawlpui hi hemi kawngah hian kan la fingvar tawk lo a, misual fing tak takte hian min la bum dâwn chauh niin a lang a, a pawh hle a ni. 

Rukrute hi IT lama mi thiam tak takte niin phone hmanga mi be pawp zetin fing leh thiam takin an che a, hei hi mipuite tán rinhlelh harsa khawp a nih avangin an bum leh mai ṭhin a ni. Inven theih dan hrang hrang zinga ṭha ber chu kan hriatthiam loh leh hriat chian loh thilah chuan mi zawhna chhan loh, hi a nih mai hmel e. 

Zawhna hrang hrang thiam taka zawtin an duh ang an dil chhuak a, an bank account an rawksak ta mai ṭhin a ni. Tun hmaa misual leh rukrute chuan kawngka leh tukverhte kar chhiain pawisa leh thil hlu te an ru a, tunlaia rukrute chuan bank account aṭang ngeiin cheng nuai tam an ru ta. 

Hetiang deuh bawk hian mi ṭhen­khat chuan sorkar pawisa a nih lohna tura hmangin, a ṭhen chu ngialngan taka hlepruin an insiam milian ṭhin a, tunlai hian rukru changkang an pung zel a ni ta ber! 

Mipuiten phone kal tlanga bank leh a kaihhnawih thil zawhna hrim hrim hi chu chhan loh a him ber tih hriat a ngai a, hriat fiah duh kan neih chuan mahni bank-ah ṭheuh zawh fiah mai a finthlak ang.