Electric bill leh mipui dinhmun

Power & Electricity depart­ment minister hoa pawl hrang hrang inhmukhawm chuan electric bill chungchang an sawiho a, mipuiin bill dik tak an pek theihna atan bill pek hun chu August 31 thleng pawh sei an rel.

Sawihonaah hian minister chuan "Bill a sang ti leh tur chuan sawiho ni-ah ṭhahnemngai taka sawi awm tak a ni a, an hmel hmuh tur a awm leh si lo," tiin bill tihsan dawna JERC-in public notice an siam thu a sawi a; meter reader-te'n hripui avanga inkaih­hruaina a khauh avang leh hri theh­darhtu an nih an hlauh vanga a hmuna kal kher loa dan phal anga bill an siam dan a sawifiah a, ama hriatpuinaa thil tih a nih avangin a mawhphurtu a nih chu minister hian a sawi.

September aṭanga bill thar anga kalpui tura rawtna awm chu Mizoram sorkarin cheng vaibelchhe tel an sen a ngaih dawn avangin sorkar tan tih­ngaih­na a wm loh thu a sawi a; August 31 thleng bill pek hun pawhsei chhung hian a duh tan complain siam theih reng a ni.

Electric bill sang tur hi sorkar lam hian an puangzar lawk ngei a, a bill tihsan a nih hmain rawtna thehluh theih a nih thute pawh puanzar a ni a; nimahsela political party pakhat tih loh chu mimal emaw, pawl emaw rawtna siam an awm lem lo. Hetihlai hian electric hman man tihniam zawnga rawtna siam hi chuan awmzia a nei tak tak ṭhin lo a, mipuiin an hriat ve hun chu a bill an dawn hian a ni mai a, an phun pawh hi thil awm lo a ni lo.

Hetihlai hian a Minister berin tun hnua mipui thiam loa puh ang maia, "Bill a sang ti leh tur chuan sawiho ni-ah ṭhahnemngai taka sawi awm tak a ni a, an hmel hmuh tur a awm leh si lo," a ti hi a zia lo hle. Hripui leng vanga hnathawk thei loa khung beh, ei tura buai tam tak an awmlaia a thlamuan zawng ni loa a chhuahchhal ang lek leka sawi hi thil fuh ber a ni lo. Mi harsa zawk dinhmun aṭanga thlir chuan an lo ngaihven lem loha electric bill pung ta leh an pawisa neih loh a innang chiah hi a manganthlak hle ang.

Hripui lenlaiin tui semtu lamin a hmuna kal chilhin tui an sem thei reng a, bawnghnute sem leh chanchinbu semte pawh nitin an kal chhuak thei; chutihlaia thla khata vawi khat meter reading ti tura P&E thawktute an chhuak thei lo hi chu sawi mawi chi niin a lang lo, an fimkhurna lam hi zahawm viau mah se hripui leng chhuanlam remchanga hahdam zawka hnathawh tumna a kawk.

Dan ang thlapa electric bill lo pung ta hi hnathawk thei loa khung beh mipui tam tak tan pek harsa khawpin a sang a, hemi avanga an lungawilohna leh an phun thawm hi sorkar lamin puitling takin lo dawngsawng thiam se, mi retheih mangan laia tuam dam loa a chhuahchhal zawnga kal palh theih lakah insum tlan ni se a ṭha ang.