Sum peipunaa inzir fing thei lo

Serchhipah mimal hnena pawisa peipunna chi khat chu sum an pek chhuah theih loh avangin mipuiin an thil neihte chhuhsak tumin an zim a, police-te inrawlh a ngai hial. Tun hnaiah Serchhipa mimal pakhat hnenah thla hnih leh a chanve vel sum daha 15% punga lak theih tiin mi 50 chuangin pawisa an dah a, cheng nuai 500 aia tam an dah hnuah pawisa a pek chhuah theih loh avangin an buai ta a ni.

Mizoram mipui tam tham takin 'Chiah­puam' an tih mai, dan loa pawisa peipunaah pawisa tam tham tak an lo dah tawh a, a punna a san em avangin chhungkaw tam takin an hlawkpui hman a, chutihlaiin chhungkaw tam takin an tlakchhiat phah thung. He pawisa peipunna hi a dik lo a ni tih leh nghawng ṭha lo tak a nei a ni tih kan hriat hnuah pawh pawisa dahpunna lam hi chu kan la um zel niin a lang a, a pawi hle a ni.

Reserve Bank of India-in a hriatpui leh phalsak pawh ni lo, bank leh financial institution pangngai pawh ni loa 'a pung a tam' tih vanga pawisa dahpun hi kan sim a hun tawh takzet a, hetiang dan phal chin piah lama hlawkna kan um luatah hian kan pawisa neih sate pawh kan chân phah thei a, mi tam takin an chan phah tawh bawk a ni.

Dan mit aṭang chuan a dahpunna neitute ang thoin a pawisa dahtute thleng hian dan bawhchhia an chang thei a, chuvangin hetiang lakah hian mipui fimkhur a ṭul takzet a ni.