Kawng chhawng versus flyover

Assembly Budget Session zawhna leh chhannaah Aizawl khawpuia Bawngkawn leh Vaivakawna flyover siamna tur chu sorkar laipui lamin an pawmpui tawh a, Aizawl khawpuia kawng chhawng siamna tur erawh ruahmanna a la awm lo a, DPR thehluh a la ni lo. 

Aizawl khawpui traffic rawt lutuk tihziaawmna turin mi ṭhahnemngaiten ngaihdan leh rawtna chi hrang hrang an sawi tawh ṭhin. MLA inthlan dâwn khan tuna kan chief minister ni ta leh MNF president hian kawng chhawng siam theih a nih thu leh sorkarna an chan chuan traffic jam awm lohna khawpui siam a, chumi atana kawng chhawng siam an tum tur thute a sawi. 

Kawng chhawng hi vawi leh khata siam nghal mai a harsa deuh a nih pawhin a siam dan tur ruangamte neih theih tawh a ṭha khawp mai a, a siam hun a rei dâwn avang tak hian siam ṭan hma pawh a ngai dawn a ni. He kawng chhawng, chief minister sawi hi siam zawh a nih hunah chuan traffic jam awm mang lohna state capital pawh kan nei lo ang tih a sawi theih loh. 

Tunah rih chuan kawng chhawng ni loin flyover lam sorkar laipuiin an rawn pawmpui tawh a, hei hi chu kawng chhawng nen chuan thil hrang daih a ni. State dangahte chuan an kawng peng ṭhuam pawimawh deuh chinah chuan flyover hi chu a awm thliah thluah a, Aizawla hmun hniha flyover siam tum hi chu thil lian tham tak kawng chhawng nen hi chuan hriat pawlhin sawi pawlh lo ila, hei hi chu hmasawnna chi dang deuh a ni. 

Aizawl mipuiin an nghah­hlelh leh traffic jam tireh thei tur chu kawng chhawng hi a ni a, sorkarin a siam zawh hlan a nghahhlelhawm takzet a ni.