Remna zawn zel ni se

Tun hnai khan Vairengte khawtlang hruaitute leh Lailapur khawtlang hruaitute chu Lailapur-ah an inkawm a, dan zawm chunga inkal pawh tawn an rem tih bakah khaw pahnih inkara boruak ṭha a awm chhunzawm theihna tura hmalak an rel.

Mizoram leh Assam-in ramriah buaina kan nei a, chu buainaa khaw langsar ber pahnih chu Mizoram lama Vairengte leh Assam lama Lailapur hi a ni awm e. Mizoram luhka kawngpui pawimawha a khaw tawp ber an nih vangin Lailapur hian Mizoram tan pawimawhna a nei lian hle a, hei tak hi hre fuhin anni lamin harsatna an siam ṭhin ta reng a ni.

Kan state pahnih dinhmun en hian ramri buaina chinfel hi chu a la thleng lawk dawn lo a ang a, kan ram hruaitute hian ramriah buaina a awm loh chuan tuna a nih ang anga hnutchhiah a, buaina awm loa kal mai hi an duh dan a la ni ber mai. Hei vang hian buaina awm loa kan awm dun theih chuan state pahnih hruaitute hi chu an lungawi leh mai dawn niin a lang a, Mizo tam takin kan ngaimawh kan ram chhung dik taka hnam dang an rawn lut hi ram hruaitu lam chuan buaina a chhuah lem loh chhung chu an ngaimawh vak duh lo a ang.

A ramri hi kan duhna takah kan sawn thei lo a nih pawhin min rawn nek bik tawh lo a nih chuan kan ram hruaitute hi chu an lungawi mai niin a lang tawh a; chutiang a nihlaia ramria buaina lo chhuak ve bawk ṭhin hian kan state tan harsatna min thlen fo a, chuvangin remna zawnga ramria khaw pahnih an lo indawr thei pawh hi thil lawmawm lam a ni e.