Oil palm leh Mizoram

Conservation Mizoram chuan, tun hnaia Prime Minister-in Twitter hmanga a tarlan sorkar laipuiin hmar chhaka oil palm chinna a lian thama kalpui a tum chungchanga Mizoram chief minister-in lawmthu a lo sawi chu pawi an tih thu an chhuah a, "Kan ram biodiversity tichhe thei sumchang thlai chinna tura hmalakna hi kalpui lo turin kan ngen tak meuh a ni," a ti.

Independence Day-a a thusawiah India Prime Minister chuan India rama edible oil tihpun a nih theihna turin National Mission on Edible Oils siam a nih thu a puang a. He mi atan hian cheng vaibelchhe 11,040 dah a ni a; North Eastern Regional Agriculture Market Corporation Limited pawhin cheng vaibelchhe 70.45 an dawn belh dawn a ni.

Mizoram Chief Minister hian Mizoramah oil palm chin hi nasa taka kalpui tur a ni tih lam engmah a puang lo a, sorkar laipuiin oil palm lama hmalak a tum dan hi social media kal tlangin a puangzar ve mai chauh a la ni.

Hetihlai hian state khat hotu lu berin hetianga thil a tarlan tawh hi chuan Mizoramah oil palm chin hi uar taka kalpui a nih ring an tam a, ṭhenkhat chuan mau leh rua aia oil palm tuipui angin thu behchhan nei lem lo an lo sawi darh leh mek.

Engpawhnise oil palm hi Mizoramah thil thar a ni lo a, a bikin Kolasib leh Mamit district-ah uar taka chin a ni tawh. A hlawhtling ti duh tan a hlawhtlinna sawi tur a awm a, a hlawhchhamna lam sawi duh tan sawi tur a tam zawk hial awm e. Kan ram tualṭo ni lem lo, hmun dang aṭanga lakluh tur, chinna hmunhma duh zau a, tui mamawh hnem leh ramngaw tichereu thei a nih vang hian mi tam tak chuan an duh lo.

Ram dangah pawh oil palm chin hi duh loin an suat mek a, India ram state dangte pawhin an kalsan chho ṭan a, Mizoramah ngei pawh oil palm hmun suat hi tam tak an awm tawh. Hetihlai hian sorkar laipuiin pawisa tam tham daha kalpui leh a tum a nih chuan uar taka kalpui leh ṭha ti pawl an awm ngei ang a; nimahsela ram a tihchhiat dante leh a nghawng ṭha lo thei awm avang hian sum ringawt ûma mahni ram tichhe thei tur uar taka chin hi a hlauhawm dan an tlangaupui ve mek a ni.