Assembly budget session kha
February 17 - March 4, 2020 chhung khan Mizoram Legislative Assembly pariatna session vawi ngana neih a ni. Kum 2020-21 chhunga Mizoram budget atan cheng vbc. 10,715 pass a ni. House-ah starred question 46 chhàn hman a ni a, chhàn hman loh 145 a awm. Unstarred question 249 a lut a, chu'ng zinga 19 chu hnâwl a ni. Bill paruk a lut a, sawiho a nih hnuah pass vek a ni.
Mizoram mipuite hian budget session hi kan ngaihven vak ngai lo nia sawi a ni ṭhin a, tun hnaiah a kum telin budget session hi mipuiin an ngaihven tial tial niin a lang. Telivision-a en theiha pek chhuah a nih mai bakah tunah chuan YouTube-ah en theih a ni ta bawk a, hei hian session entu nasa takin a tipung ngei ang.
YouTube-a dah a nih chuan a hunlaia en hman ve lote pawhin an hman remchan hunah an duhlai tak an hai chhuak zel thei a, chuvangin kan legislator-te thiamna, taimakna leh tih tak takna pawh chiang takin a hmuh theih a; chumi lehlamah chuan an thiam loh leh hriat loh dan te, an tih tak tak tawk loh dante leh an inthlahdah dante thlenga hmuh theih a ni ve bawk.
Social media lamah pawh Assembly Budget Session lamin chai zui a hlawh a, thusawi ṭha an tihte video an thehdarh a, thusawi hlimawm deuhte thlenga thehdarh a ni. Hei hian kan legislator-te tan zir tur tam tak a chhawp chhuak a, tun hmaa House-a an thusawi anga sawi liam puat kha a rem tawh lo a, thudik leh rintlak chauh sawina tur a ni a, rinthu leh duhthusam sawina tur a ni lo tihte pawh an hre chiang zel ang.