Kan duh vang ni loin Hri nena len dun a ṭul

Covid-19 hripui leng avanga hun rei tak chhung khar a nih hnuah, Mizoram sorkarin a phal angin hmun hrang hrangah biak-ina inkhawm an phal ṭan leh dâwn ta a, hei bakah hian khaw ṭhahnem takah zirna in pawh chhunzawm a ni leh tawh a ni.

Mizoram hi hripui leng avanga inkharkhip leh inkhuah­khirh rei ber pawl kan ni a, tlawmngai pawl, kohhran leh khawtlangin hripui an do nasatna hmun a ni bawk a, nimahsela van­duaithlak takin hripuiin ziaawm lam a pan thei meuh lo. Hetia thlir thuak phei chuan keini aia inkhuahkhirh ṭha lo leh fimkhur lo zawk state-te hi hripuiah hian an fihlim ta mah zawk emaw tih turte pawhin a awm.

Engpawhnise kan duh vang reng ni loin hripui chu kan ramah a lo lut tawh si a, hripuiin min chhuahsan huna ngaiawh kan tum chuan kawng hrang hrangah kan tuar thei tih hriain, hripui a la lêng reng chung pawhin kan nunphung pangngaiah zawi zawiin kan kir leh ṭan dâwn ta.

Hripui vei awm lohna khua­ah biak-in an hawng ṭan a, zirna sikul an hawng leh tawh bawk a; nunphung pangngaia kir lehna kawng kan zawh ṭan mêk hi thil lawmawm tak a ni. Fimkhur tak leh thuawih takin he hri pui leng karah hian hmasawn tumin i ṭang rual zel ang u.