Vairengte gate-a thil endik

Vairengtea Excise & Narcotics department enforcement staff-te chuan tun hnaiah Assam lam pan tur lirtheite an endik a, endikna paltlangte chauh clearance certificate pein an kal tlang zel an phalsak.

Vairengtea Mizoram lirthei chhuak tur endik hi Kolasib DC aṭanga thupek an hmuh bawhzuiin an kalpui a, tun hnaia Assam-a Mizoram lirthei an endika ruihhlo an man hnuah hei hi an kalpui ta niin a lang.

Ramri a buai hnuah state pahnih inkarah inremna awm angin lang mah se kan ṭhenawm state-te hi rin ngam tak tak an harsa a, tun hnaia Mizoram motor an man dan pawhin rinhlelh a kai hle.

Engpawhnise hetianga fing taka lo endik khalh hi a lawmawm a, ruahmanna siam­tute an fakawm hle a ni. Lirthei chhuak tur mai ni loin lirthei lut tur lam pawh hi endik theih ni se, hei hian ruihhlo lo lut tur pawh a tih tlem theih a beiseiawm.

Assam police lamin lirthei an manah khan khawchhak aṭanga kuhva rah lo chhukte pawh an man tel a, ruihhlo anga kan ngaih loh dan loa sumdawnna an lo man hi an tih tur dik tak an ti niin a sawi theih ang. Mizoramah hian ruihhlo leh ralthuam a nih em loh chuan dan loa sumdawnna ṭhenkhat hi thil thiang anga ngaiin kan thlir lian ṭan mêk tawh niin a lang a, Assam Rifles lam erawh chuan an mansak zauh zauh tawh a, tunah Assam Police lamin an lo man ve leh ta a ni.

Vairengtea lirthei chhuak tur an lo endik hi chhunzawm zel ni se, ruihhlo piah lamah dan pela sumdawnna dang pawh hi zuah ni bîk suh se.